Ditën e kaluar Lëvizja Vetëvendosje njoftoi se është arrestuar aktivisti Egzon Ademi nga disa policë civilë. Sipas saj, Ademit në momentin e arrestimit nuk i është dhënë asnjë arsyetim për arsyen e ndalimit.
“Atij nuk i është dhënë asnjë arsyetim se pse është marrë nga policia e cila po vazhdon t’i ndjekë aktivistët në çdo hap. Kjo po i shpenzon forcat e saj në ndjekjen e aktivistëve të pashembullt për aktivitetet e tyre politike, përderisa kriminelet e qeverisë po i vazhdojnë shëtitjet e tyre të papenguar.” thuhej në komunikatën e VV-së.
Por policia ende nuk ka dhënë një version zyrtar për ndalimin e këtij të fundit. Gazeta Express ka kontaktuar me zëdhënësin e policisë por ky i fundit ka shprehur se nuk ka ndonjë informacion për arrestimin e Ademit.
Më herët Policia e Kosovës ka arrestuar 6 zyrtarë të Lëvizjes Vetëvendosje me akuzën
për sulmin ndaj Kuvendit.
“Prokuroria Speciale e Kosovës në bashkëpunim me Policinë e Kosovës pas një hetimi intensiv me sulmin e Kuvendin e Kosovës, ka arritur të identifikojë të dyshuarit, të cilët kanë planifikuar, organizuar dhe ekzekutuar sulmin, si dhe kanë marrë përgjegjësinë për kryerjen e këtij sulmi”, thuhej në komunikatën e Prokurorisë Speciale të Kosovës.
