Analisti Dukagjin Gorani thotë se peticioni i Vetëvendosjes, mund ta sjellë shoqërinë në dëshpërim dhe në konflikt. Atëherë, thotë ai, mund të harrohet Asociacioni.
Ai ka thënë se populli shqiptar, shpeshëherë është shprehur përmes peticioneve, por askush nuk e ka dëgjuar dëshirën e tij. Sepse, thotë ai, dëshirat politike ndonjëherë nuk realizohen përmes peticioneve.
“Në vitin 1991 është mbajtur referendum në Kosovë për ta shpallur pavarësinë dhe janë dalë 99.95 për qind e popullit të Kosovës. Kemi nënshkruar për pavarësinë tonë si shtet dhe kërkush hesapë nuk na ka bërë. Nëse VV del me peticion për bashkim me Shqipërinë, do t’i ketë 2 milion nënshkrime, por a do të bëhej realiteti me disa nënshkrime. Pra ne jemi duke ardhur tek akti i nënshkrimit. Por tjetër është të dishë, të keshë dhe të mundesh. Prandaj, a janë këto 100 mijë nënshkrime edhe për t’i mundësuar dëshirat tona”, tha Gorani në një emision televiziv.
“Pas kësaj mund të vie dëshpërimi. Unë kam frikë nga sentimenti i nënshkrimit. Nuk kam dëshirë ta shoh shoqërinë tonë duke u zhytur thellë në dëshpërim, për shkak se disa dëshira tonat politike, janë të pamundshme për momentin. Vështrimet e mia karshi Vetëvendosjes, është se loja me dëshirat tona di të jetë lojë e rrezikshme”, thotë ai.
