Kandidatët potencialë për studentë të Farmacisë e Stomatologjisë të hënën kanë filluar një grevë para Rektoratit.
Ata thonë se nuk e kanë ndërmend të lëvizin nga aty derisa të plotësohen kushtet e tyre dhe të shtohet numrin e studentëve në këto degë të Fakultetit të Mjekësisë, njofton Klan Kosova.
Përfaqësuesja e këtyre të rinjve, Lyra Namani, ka thënë në Ora e Fundit të Klan Kosovës se, do ta bllokojnë Rektoratin dhe punën e këtij institucioni, derisa t’u plotësohen kushtet.
“Jemi duke protestuar para rektoratit sepse kërkojmë të plotësohen të drejtat tona. Fillimisht me 6 korrik ministria e arsimit ka marrë vendim që të pranohen 70 persona në stomatologji dhe 50 në farmaci, dhe se vendimi hyn në fuqi që nga dita e nënshkrimit”.
“Këto pika janë shkelë nga rektorati pa u shfuqizuar ato të mëparshmet. E kanë konsideruar mungesën e tregut të punës për limitimin e numrit. Kjo është shkelje ligjore sepse nuk mund të merren dy vendime njëkohësisht”.
“Ne nuk jemi kundër askujt, por vetëm kërkojmë zbatimin e ligjit dhe të drejtën tonë të shkollimit. Ne e kemi dërguar kërkesën në ministrinë e arsimit ku pas shqyrtimit është konstatuar të merret vendimi për pranimin tonë”, ka thënë Namani.
