Vendimi i Qeverisë së Kosovë për të ndryshuar Tatimin mbi Vlerën e Shtuar (TVSH), pos që nuk pritet të ketë ndikim direkt në lehtësimin e jetës së qytetarëve, ka bërë që të plaçkiten edhe bizneset në Kosovë.
Gazeta Blic nga burime brenda Ministrisë së Financave ka mësuar se pas hyrjes në fuqi të ndryshimeve fiskale, gjegjësisht uljes së TVSH-së për disa produkte dhe rritjes për disa të tjerë, të gjitha bizneset do të detyrohen që t’i riprogramojnë arkat e tyre fiskale, që do të kushtoj 25 euro për secilën arkë.
“Në Kosovë janë mbi mijëra biznese, të cilat do të detyrohen që t’i riprogamojnë arkat e tyre fiskale në përputhje me ndryshimet që kanë ndodhur me TVSH-në. Çmimi për secilën arkë do të jetë 25 euro”, ka thënë ky burim.
Ndryshe, nga sot kanë hyrë në fuqi ndryshimet tatimore të ndërmarra nga ministri i Financave, Avdullah Hoti. Sipas kësaj pakoje të re tatimore, TVSH-ja nga 16 për qind që ishte për produktet bazë si mielli, buka, vaji…, do të ulet në 8 për qind, derisa për produktet tjera si nafta e të tjera do të rritet TVSH-ja.
Njohës të fushës së ekonomisë konsiderojnë se ky ndryshim i TVSH-së do të godasë vetëm qytetarët. Sipas tyre, përpos që do të ketë rritje të çmimit tek ato produkte ku është rritur TVSH-ja, nuk do të ketë rënie të çmimit tek ato produkte ku ka pas ulje të TVSH-së.
KËTU mund ta gjeni një shkrim të Astrit Gashit për efektet e TVSH-së.
Në anën tjetër, Kestrin Kumnova zëdhënës i katër kompanive të licensuara për pajisje fiskale, e ka konfirmuar për Gazetën Blic këto pagesa prej 25 eurosh për bizneset. Megjithatë, ai ka shtuar se ato biznese që e kanë të periudhën e servisimit këtë do ta kenë gratis.
“Pas ndryshimit të ligjit për TVSH nga ana e Ministrisë së Financave, bizneset janë të obliguara të bëjnë ndryshime teknike në pajisje fiskale dhe kompanitë e licencuara e ofrojnë këtë shërbim me pagesë prej 25 euro plus TVSH. Këtë pagesë për servisim janë të obliguara ta bëjnë një numër kryesisht i vogël i bizneseve pasi ato biznese që tash e kanë kohën e kontrollës periodike vjetore dhe ato biznese që posedojnë pako të garancionit këtë shërbim e kanë falas.
Cdo ndërhyje në pajisje fiskale duhet të bëhet përmes teknikëve të autorizuar për shkak të rëndësisë dhe të dhënave që përmban pajisja fiskale. Sikurse paguhet për cdo servisim të pajisjeve elektronike (sikurse telefonat, kamerat, televizioret) edhe për pajisjet fiskale caktohen pagesa të servisimit që në këtë rast janë minimale”, ka thënë ai për Gazetën Blic./ Gazeta Blic
