![Kundërshtohet pelegrinazhi i serbëve në kishën e Gjakovës, një i arrestuar [foto]](https://infosot.com/wp-content/uploads/2015/08/20150828144540146646-660x375.jpg "Kundërshtohet pelegrinazhi i serbëve në kishën e Gjakovës, një i arrestuar [foto]")
Një Grup qytetarësh, kryesisht aktivistë të Lëvizjes Vetëvendosje, kanë protestuar sot në Gjakovë duke kundërshtuar vizitën e pelegrinëve serbë, që kishin ardhur në kishën ortodokse në Gjakovë me rastin kremtimit të festës se tyre të quajtur “Festa e Zonjës së Bekuar”.
Pak metra nga objekti fetar, një grup i vogël i protestuesve, kryesisht aktivistë të Lëvizjes Vetëvendosje, kanë protestuar duke e kundërshtuar prezencën e serbëve në Gjakovë, transmeton KTV.
Në momentin e daljes nga kisha të pelegrinëve, protestuesit kanë hedhur ngjyrë të kuqe ndërsa në momente të caktuara kanë pasur konfrontime edhe me pjesëtarët e policisë së Kosovës. Megjithatë, pas përfundimit të protestës, komandanti i Stacionit Policor në Gjakovë, Kristë Gjokaj, ka thënë se gjithçka ka shkuar sipas planifikimit dhe në mënyrë të qetë, me përjashtim të arrestimit të dy personave, pjesë e grupit protestues.
E përpos pelegrinëve serbë nga Beogradi, aty kanë qenë edhe zv.kryeministri i Kosovës , Branimir Stojanoviq, si dhe ministri për Komunitete dhe Kthim, Dalibor Jevtiq.
Si edhe herëve të tjera, ardhjen e delegacionit serb në Gjakovë e kanë kundërshtuar disa aktivistë të Lëvizjes Vetëvendosje dhe qytetarë të tjerë.
Nga Gjakova raportohet se qytetarët dhe aktivistët ishin mbledhur para kishës për të kundërshtuar ardhjen e delegacionit serb në kishë, ndërsa aktivistja e LVV-së, Mimoza Shala, kishte shkruar në rrugë “S’ka pajtim pa drejtësi”.
Policia në Gjakovë i ka thënë KTV-së se kishte shpërndarë protestuesit e Lëvizjes Vetëvendosje, që po kundërshtoni këtë vizitë.
Nga ana tjetër, mediet e Beogradit raportojnë se një grup shqiptarësh të pakënaqur kishte shpërthyer kordonin e policisë në Gjakovë, se kishte hedhur mbi vizitorët serbë petarda dhe hedhur mbi policë ngjyrë të kuq.
RTS thekson se forca të mëdha policore kanë siguruar serbët e zhvendosur që kishin ardhur në Gjakovë për të shënuar një festë të tyre. Po sipas këtij burimi, policia përdori gaz lotsjellës për shpërndarjen e tyre.
Policia ka arrestuar një person.
Protestuesit kanë brohoritur “Serbia s’mund të kalojë”, ndërsa në një transparent shkruante “Nuk ka pajtim pa drejtësi”.
Ndërkohë shqiptarët e tubuar janë shpërndarë, ndërsa serbët të përcjellë nga policia lanë Gjakovën dhe shkuan drejt Manastirit të Deçanit.
Serbët e zhvendosur nga Gjakova disa herë janë penguar të vizitojnë kishën e qytetit.
Ndërkohë, Lëvizja Vetëvendosje përmes një komunikate theksoi se Policia e Kosovës ndërhyri brutalisht ndaj qytetarëve dhe aktivistëve në Gjakovë, të cilët spontanisht po protestonin kundër vizitës së ministrit nga Lista “Srpska” për Komunitete dhe Kthim, Dalibor Jevtiq.
Para gjysmë ore, sipas po kësaj komunikate, në Istog policia arrestoi edhe një aktivist të Vetëvendosjs, Denis Ibërdemajn, për shkak të shkrimit të parullave kundër “Zajednicës”.
Çdo përpjekje për ta kundërshtuar projektin e Serbisë në Kosovë, po shtypet me dhunë nga policia e Isa Mustafës, thuhet në komunikatë.
Gjakova është një nga qytetet që ka pasur më së shumti viktima e dëme nga pushtuesit serbë në luftën e fundit, ndërsa ka po ashtu numrin më të madh të të pagjeturve.
