Deda thekson se Kosova ka pasur mundësi të krijojë një Gjykatë për krime lufte, por kjo nuk u bë për fajin e PDK-së.
“Mendoj se ka pasur mundësi të ketë konsensus që Kosova të ketë një Gjykatë për krime lufte. Natyrisht se ka pasur krime lufte por edhe krime të pasluftës. Gjykata për krime të luftës ka mundur ta ketë një Dhomë të Veçantë me prokurorë e gjykatës ndërkombëtarë. Por, fajtore është udhëheqësia e PDK-së. Ajo e ka pasur një prioritet tjetër, që janë tri çështje: që ta dinë kush janë dëshmitarë, të kenë qasje në arkivat e shtetit dhe të dënuarit t’i vuajnë dënimet këtu. Këto dihet mirë që Perëndimi nuk i pranon”, potencon deputeti i Vetëvendosjes.
“Jemi populli i vetëm në Evropë pas Luftës së Dytë Botërore që i bëhet një gjykatë ndërkombëtare, pas Gjermanisë, Gjykata e Nurembergut”, ka thënë më tej Deda.
Deda, i turpëruar me gjuhën e deputetëve
Deputeti i Lëvizjes Vetëvendosje, Ilir Deda, ka thënë se ndjehet i turpëruar nga niveli i djeshëm i komunikimit mes deputetëve në Kuvend.
Deda, i ftuar në Interaktiv të KTV-së, ka thënë se nuk pajtohet me atë nivel të diskutimit duke qenë një ndër 20 deputetët më të votuar.
“Nuk e shoh veten në rol të të qenit fanatik partiak. Kam opinionin tim politik”, ka thënë Deda.
Ai tha se asgjë nuk i ka pëlqyer ditën e djeshme dhe thotë se e kemi maltretuar popullin për më shumë se 8 orë me ato diskutime.
Diskutimet më të ashpra janë zhvilluar në mes të deputetit të partisë nga e cila vjen edhe Deda, Fisnik Ismailit dhe Latif Gashit nga PDK, të cilët hodhën akuza të ashpra ndaj njëri-tjetrit.
