Xhevdet Qeriqi, përfaqësues i Këshillit për Mbrojtjen e të Drejtave të Veteranëve, ka paralajmëruar protestë për të hënën në lidhje me vonesat e shkaktuara në publikimin e listave përfundimtare të veteranëve.
Ai, përmes një thirrjeje të publikuar në Facebook, ka kërkuar nga bashkëluftëtarët e tij që t’i bashkëngjiten në këtë protestë duke thënë se protesta po organizohet edhe për të kërkuar nisjen e zbatimit të ligjit për veteranët e luftës së UÇK-së.
“Arsyeja e kësaj proteste është vonesat e pakuptimta të listave përfundimtare që po bëhen nga komisioni qeveritar për njohjen e statusit të veteranit të UÇK-së. Po ashtu kërkesë tjetër do të jetë fillimi i zbatimit të ligjit për veteranet e luftës të UÇK-së”, ka shkruar Qeriqi, raporton Koha.net.
Protesta e thirrur nga Qeriqi planifikohet të mbahet ditën e hënë, 3 gusht 2015, duke filluar nga ora 12.00 në sheshin “Skënderbeu” në Prishtinë.
