Pavarësisht kundërshtimit të stafit civil, në orët mëngjesit të së shtunës, është tentuar zhvendosja e materialeve dhe gjësendeve tjera nga Ministria e Kulturës.
Kompania “Uni Projekt”, e kontraktuar nga Ministria e Administratës Publike, ka provuar t’i largojë këto materiale nga objekti i Ministrisë, asistuar edhe nga Policia, por kjo nuk është lejuar nga punonjësit e këtij institucioni.
Kryetari i Sindikatës së punëtorëve të kësaj ministrie, Labinot Berisha, ka thënë se aksioni i sotëm është bërë pa vendim zyrtar dhe, sipas tij, në mënyrë të jashtëligjshme, shkruan koha.net.
Berisha ka paralajmëruar se nëse vazhdojnë tentimet për zhvendosjen e ministrisë në objekt privat, do të bojkotojnë punën.
Stafi i ministrisë ka kundërshtuar vazhdimisht përmes protestave, zhvendosjen e kësaj ministrie.
