Kryetari i Komunës së Gjilanit, Lutfi Haziri, ka shpallur të premten ditë zie, pas tragjedisë së rëndë të së martës, me ç’rast u shua familja pesë anëtarëshe Bllaca.
“Me këtë rast, ndërpriten të gjitha aktivitetet kulturore e politike të planifikuar për këtë ditë, si dhe do të vendosen flamujt në gjysmë shtizë, në të gjitha institucionet komunale”, thuhet në vendimin e kryetarit Haziri, të datës 20 shkurt 2020.
Ndërkaq, familja Bllaca, ka hapur të pame në Cërnicë të Gjilanit, fshat nga ku e kanë prejardhjen pesë të vrarët në tragjedinë e djeshme të Gjilanit.
Pesë anëtarët e familjes Bllaca, kanë vdekur ditën e martë. Dyshohet se zyrtarja policore Valdete Bllaca ka privuar nga jeta prindërit, dy vëllezërit dhe më pas vetën, transmeton Telegrafi.
Policia e Kosovës ka bërë të ditur se vrasja dyshohet të jetë kryer me revolen e Policisë së Kosovës, për të cilën dyshohet se e ka poseduar viktima.
