Nënkryetari i Kuvendit të Kosovës, Xhavit Haliti ka dërguar një sqarim publik në lidhje me deklaratat e tij sot gjatë drejtimit të Kuvendit të Kosovës, në lidhje me statusin e dëshmorëve për disa familje.”Nuk kam se si të mos vazhdoj për t’i nderuar dëshmorët, ndër ta edhe Afrim Zhitinë, i cili ra dëshmorë me armën të cilën i dhash unë. Prandaj askush nuk mund të më akuzoj se nuk i respektoj dëshmorët”, ka thënë ai.
Ja reagimi i plotë i Halitit:
Ndoshta u keqkuptova. Dëshmorët janë të shenjtë për mua
Sot, gjatë drejtimit të seancës së punimeve të Kuvendit, saktësisht pas pyetjes së deputetit të Vetëvendojses, Mytaher Haskuka, për mosnjohjen e statusit të dëshmorëve të rënë para luftës së fundit në Kosovë, ndoshta mund të jem keqkuptuar.
Dua të bëjë të qartë për opinion publik se sikurse dje, ashtu edhe sot, por edhe në të ardhmen do t’i respektoj të gjithë ata që kanë kontribuar për çlirimin, lirinë dhe pavarësimin e Kosovës, në veçanti ata që kanë rënë me pushkë në dorë, të cilët për mua mbeten të shenjtë.
Secila familje ka të drejtë të kërkoj statusin e dëshmorit për djemtë apo vajzat e tyre të rënë për lirinë e vendit. Dhe tashmë ne kemi edhe ligjin për statusin e dëshmorit të UÇK-së.
Nëse do të ketë ndonjë nismë për ndryshimin e tij, unë do të jem ndër të parët që do ta mbështes pa hezituar fare.
Nuk kam se si të mos vazhdoj për t’i nderuar dëshmorët, ndër ta edhe Afrim Zhitinë, i cili ra dëshmorë me armën të cilën i dhash unë. Prandaj askush nuk mund të më akuzoj se nuk i respektoj dëshmorët.
Poashtu dua të sqaroj se nuk ka qenë deklaratë, por thjesht fjalë e çastit. Nëse familjet e dëshmorëve të rënë para luftës çlirimtare janë ndier të ofenduar, u kërkoj falje.
