Kryetari i Kuvendit të Kosovës, Kadri Veseli, ka premtuar ndihmë për komunën e Gjakovës veçanërisht në angazhimin e saj për zhvillimin ekonomik lokal, duke thënë se Kuvendi i Kosovës do të nxjerrë ligje që do të ndikojnë pozitivisht në këtë drejtim.
Këtë deklaratë, Veseli e ka dhënë të mërkurën gjatë një takimi që e ka pasur me kryetaren e Komunës së Gjakovës Mimoza Kusari – Lila. “Ne do të përpiqemi që të nxjerrim dhe të aprovojmë ligje që do të jenë në shërbimin tuaj”, ka thënë Veseli, ndërsa konkretisht për komunën e Gjakovës e ka përmendur përshpejtimin e procedurave për funksionalizimin e Zonës së Lirë Ekonomike, krijimin e Zonës Industriale dhe zgjidhjen e shpejtë të çështjes së ndërmarrjeve shoqërore.
Nga ana tjetër, sipas kryetares së Gjakovës Mimoza Kusari – Lila, tani është momenti për të vepruar sa më shpejt në aspektin ekonomik në mënyrë që Gjakova ta ketë një zhvillim të gjithmbarshëm dhe se në këtë drejtim më nuk ka kohë për të humbur.
