USAID-i dhe Shtëpia e Modës “Menakon” nga Gjilani, të mërkurën patën një takim për një partneritet që rrit stimulimin e punësimit në tregun vendor të Kosovës…
Shtëpia e modës dhe kreacionit më serioz në Kosovë dhe rajon, “Menakon”, me seli në Gjilan, në një tubim të përbashkët në selinë e biznesit të saj, kanë nënshkruar partneritet bashkëpunimi, e që USAID-i, me z. Dejvid King, drejtor për përkrahje të sektorit privat “Empover”, ka marrë përsipër financimin e shkollimit të një numri të konsiderueshëm të nxënëseve, të cilat pas mbarimit të shkollimit do të punojnë në “Menakoni”, në këtë shtëpi të madhe të modës.
Nadire Zymberi, kreatorja e Shtëpisë së Modës “Menakon”, në Gjilan, ka thënë se “USAID-i ka besim të plotë në ne, pra në “Menakon” dhe se ky partneritet vetëm sa ka filluar.
Në prani të shtëpive simotra të modës: “Qëndresa”, “Buna”,”Atele”Lejla “Libeal”, “Lenti”, “Fashion” dhe “Ilirida”, si dhe të shumë mysafirëve të pranishëm në këtë takim të përbashkët USAID-MENAKON, zonja Zymberi, veç të tjerash, shtoi:
“Me këtë marrëveshje të arritur fillon një rrugë e re e aftësimit të brezit të ri, për perspektivë tregu të punës në Kosovë”.
Vijueset e shkollimit financohen nga USAID-i
Shtëpia e Modës “Menakon”, me pronar Metush Zymberin, ideator i saj, është themeluar më 1992 dhe ka aftësuar shumë vijues të këtij profili në Kosovë. Aktualisht, “Menakoni” ka shumë punëtorë dhe pritet të zgjerohet edhe me të tjerë. Pra, do të zgjerohet me vijuesit që do të aftësohen nga “Menakoni”.
Dejvid King, drejtor i projektit “Empover”, në këtë tubim shumë të rëndësishëm partneriteti kontraktues, tha se “USAID-i ka fituar besim të plotë në Shtëpinë e Modës “Menakon”, sepse është shtëpi serioze e modës, e që ka funksionuar dhe është dëshmuar edhe në kohë të vështira. Andaj, bashkëpunimi ynë me këtë shtëpi të madhe të modës edhe është mjaft i qëlluar”.
Investimi në “Menakon” – në interes të brezit të ri
Në emër të nxënëseve që do e vijojnë mësimin në këtë shtëpi të madhe mode, foli Vildane Ismaili, e cila tha se “Investimi në “Menakon” është investim në interes të brezit të ri”.
Dhe, për gjithë këto fjalë të mira për Shtëpinë e Modës “Menakon”, e që u thanë në këtë tubim shumë të rëndësishëm, u bindëm edhe vetë, meqë pas përfundimit të këtij tubimi vizituam lokalet e kësaj shtëpie të madhe të modës, e që çdo kreacion i kësaj shtëpie ishte me vlerë si askund tjetër dhe në hap me kohën…
/Kosovarja/
