Në qytetin Nagasaki në Japoni është mbajtur një ceremoni për shënimin e 70 vjetorit të hedhjes së bombës atomike.
Në këtë ceremoni, e cila u mbajt më 9 gusht e që organizohet për çdo vit, kanë marrë pjesë persona të mbijetuar, mysafirë ndërkombëtarë e të tjerë.
Në orën 11:02 është mbajtur një minutë heshtje.
Në këtë kohë Shtetet e Bashkuara e kishin hedhur bombën atomike, me ç’rast janë vrarë 70 mijë njerëz dhe ka ndikuar në kapitullimin e Japonisë në Luftën e Dytë Botërore.
Në sulmin e parë me bombë atomike në qytetin Hiroshima, tri ditë para sulmit në Nagasaki, ishin vrarë 140 mijë vetë.
Kryeministri i Japonisë, Shinzo Abe, e ka shfrytëzuar këtë përvjetor për ta përsëritur synimin “për ta udhëhequr botën në përpjekje kah çarmatosja bërthamore”.
“Si vend i vetëm në botë, që ka përvojë nga bomba atomike gjatë luftës, dhe zbatimin e tri parimeve tona atomike, i kam ripërtërirë përkushtimet tona për ta udhëhequr botën në përpjekje kah çarmatimi bërthamor me qëllim që të ndërtohet një botë pa armatim atomik”, tha Shinzo Abe, duke folur në ceremoninë në Nagasaki, me rastin e shënimit të 70 vjetorit të sulmit me bombë atomike.
Prefekti i Nagasakit, Tomisha Taue, ka shprehur shqetësim se pacifizmi i Japonisë “ka filluar të lëkundet”.
Në këtë aspekt, ai ka theksuar se parlamenti i këtij vendi aktualisht po e diskuton një legjislacion me të cilin shqyrtohet lejimi, që ushtria të luftoj matanë oqeanit, për të parën herë prej përfundimit të Luftës së Dytë Botërore.
“Aktualisht ka debat në parlamentin tonë lidhur me legjislacionet, që do ta ndryshojnë natyrën e sigurisë sonë kombëtare. Ekziston, po ashtu, shqetësim në rritje se përkushtimi ynë i para 70 vitesh, ideali i kushtetutës sonë paqësore, po fillon të lëkundet. Kërkoj nga qeveria dhe parlamenti t’i dëgjojnë shqetësimet, brengat dhe debatin e njerëzve, dhe ta përdorin mençurinë e tyre në mënyrë të kujdesshme dhe të sinqertë”, tha Tomisha Taue.
Në mesazhin e sekretarit të përgjithshëm të Kombeve të Bashkuara, Ban Ki-moon, po ashtu, është kërkuar tërheqja e armatimit bërthamor.
“Me gjithë zemër u bashkohem juve në jehonën e thirrjes globale: jo më Nagasaki dhe jo më Hiroshima”, ka shkruar Ban Ki-moon, në mesazhin e tij, që u lexua nga Kim Wom-soo, përfaqësues i lartë i Kombeve të Bashkuara për çështjet e çarmatimit.
Në këtë ceremoni kanë marrë pjesë përfaqësuesit e 75 vendeve, përfshirë ambasadoren e Shteteve të Bashkuara në Japoni, Caroline Kennedy, dhe nënsekretaren amerikane të shtetit për kontrollin e armatimit dhe sigurinë ndërkombëtare, Rose Gottemoeller.
“Derisa ne i përkujtojmë ata që u zhdukën në Nagasaki dhe i përkujtojmë të gjitha viktimat e Luftës së Dytë Botërore, ne përsëri e shprehim përkushtimin tonë për të punuar kah një botë, ku të gjithë njerëzit do të jetojnë në paqe”, tha ambasadorja Kennedy, nëpërmjet një deklarate./rel/
