Nën organizimin e Partisë Demokratike dhe opozitës shqiptare në Shqipëri, në sheshin qendror të Tiranës po mbahet një protestë, në kërkim të rrëzimit të qeverisë së udhëhequr nga kryeministri Edi Rama.
Kryetari i Partisë Demokratike, Lulzim Basha, u tha të pranishmëve në protestë se qeverinë duhet rrëzuar, duke qenë se “është e zhytur në korrupsion, dhe po varfëron çdo ditë e më shumë shqiptarët”.
Gjatë fjalimeve të përfaqësuesëve të opozitës, ka patur disa incidente të vogla.
Disa prej protestuesëve janë shoqëruar në polici, pasi kanë thyer kordonin e policisë. Ndërkohë është goditur me vezë dhe baltë godina e kryeministrisë.
Gjithashtu janë ndezur edhe disa fishekzjarre me ngjyra, por policia i ka lokalizuar këto incidente të vogla.
Një ditë më parë, zoti Basha ka ftuar edhe të rinjtë, “ashtu si studentët e 8 dhjetorit të vitit 1990, të marrin në dorë të ardhmen e Shqipërisë dhe jo të largohen”.
Qëllimi i protestës, thonë organizatorët, është një reagim qytetar, për rrëzimin e qeverisë me protestë paqësore, e cila nis sot, por edhe mund të vazhdojë në ditët në vazhdim, duke shpënë në mosbindje civile.
Sipas organizatorëve, “do të jetë një qëndresë paqësore ajo që do të detyrojë qeverinë të tërhiqet dhe të cojë në krijimin e një qeverie teknike, e cila do të shpjerë vendin në zgjedhje të parakohshme”.
Autoritetet e rendit kanë marrë masa të larta sigurie. Mbi 1500 policë kanë marrë përsipër mbarëvajtjen e qetë të kësaj proteste, ndërkohë që kordoni i parë i policisë përballë protestuesëve, janë oficere femra.
Ndryshe, kjo protestë zhvillohet në 25 vjetorin e nisjes së lëvizjes studentore në Shqipëri, që solli rrëzimin e sistemit komunist dhe vendosjen e sistemit pluralist.
Ndërkohë, rreth orës 10.00 të paradites, presidenti i Republikës, Bujar Nishani organizoi një konferencë ndërkombëtare me titull “Shqipëria dhe Evropa, 25 vite nga rënia e komunizmit”, ku ishin të pranishëm të gjithë krerët më të lartë të vendit.
Gjatë kësaj Konference, u përcollën mesazhet e urimit nga Papa Françesku, kancelarja gjermane Angela Merkel dhe Sekretari amerikan i Shtetit, John Kerry.
