Kryetarja e Kuvendit të Kosovës, Albulena Haxhiu, ka prezantuar projektplanin e punës për Agjendën Parlamentare për Çështje të Grave dhe Barazi Gjinore 2027–2030, në një takim ku morën pjesë përfaqësues të institucioneve, partnerë ndërkombëtarë dhe organizata të grave.
Përmes një postimi, Haxhiu bëri të ditur se kjo agjendë synon t’i ofrojë Kuvendit një plan të qartë pune deri në vitin 2030, me fokus në fuqizimin ekonomik të grave, arsimin, punësimin, mbrojtjen nga dhuna dhe mbikëqyrjen parlamentare të zbatimit të ligjeve.
Ajo theksoi se në kuadër të këtij angazhimi do të organizohen edhe vizita në rajone të ndryshme të Kosovës, me qëllim të takimit me organizatat e grave dhe përfshirjes së përvojave të tyre në punën parlamentare.
Haxhiu nënvizoi se barazia gjinore duhet të reflektohet në jetën e përditshme, përmes pagës së barabartë për punë të njëjtë, të drejtës së barabartë në pronë dhe përfaqësimit të grave në proceset vendimmarrëse.
Ajo vlerësoi kontributin e grave në Kosovë, të cilat udhëheqin biznese e institucione dhe përfaqësojnë vendin edhe në arenën ndërkombëtare sportive, duke theksuar se Kuvendi ka përgjegjësi të krijojë mundësi të barabarta për çdo grua dhe vajzë.
Në fund, kryetarja e Kuvendit falënderoi zëvendëskryeministren dhe ministren e Drejtësisë, Donika Gërvalla-Schwarz, kryetaren e Komisionit për të Drejtat e Njeriut, Fatmire Mulhaxhën, kryesuesen e Grupit të Grave Deputete, Arijeta Rexhepin, UN Women në Kosovë dhe të gjithë pjesëmarrësit për kontributin dhe gatishmërinë për bashkëpunim.
































