Në Qendrën Kulturore dhe Informative të BE-së në Prishtinë, nesër (21 maj), prej orës 11:00-12:15, lansohet Akademia Kosovare e Modelit të Kombeve të Bashkuara (KMUNA). Ky projekt nga OJQ Iniciativa për Prosperitet në Kosovë (PIKS) mbështetet nga Ambasada e SHBA-ve në Kosovë.
KMUNA është një projekt i cili do të kontribuojë në edukimin e të rinjve për të qenë të ndërgjegjshëm për politikat globale përderisa rriten si liderë potencial të fushave të ndryshme, që në të ardhmen të mund të udhëheqin agjendën e zhvillimit të shtetit tonë me diligjencë e integritet, thuhet nw njoftimin e dërguar pwr media.
Modeli i Kombeve të Bashkuara (MOKB) është simulim i punës së organeve më të larta të OKB-së siç janë: Këshilli i Sigurimit, Asambleja e Përgjithshme dhe komitetet e saj. Nxënësit e shkollave të mesme përmes këtij aktiviteti edukativ, luajnë rolin e delegatëve të shteteve të OKB-së dhe përjetojnë se si përgatitën ata, si mbahen takimet protokolare dhe me çfarë intensiteti të punës performohet.
Akademia Kosovare e Modelit të Kombeve të Bashkuara (KMUNA) do të jetë një platformë informale e edukimit që do të ndihmojë në pasurimin e kualitetit të edukimit publik për nxënësit e shkollave të mesme në Kosovë. Përvoja që KMUNA do të ofroj është interaktive, e bazuar në principin e të mësuarit përmes praktikës dhe mjedisit multietnik.
Në vitin 2015, akademia KMUNA do të ofrojë hapësirë për rreth 200 nxënës nga shkollat e mesme të Kosovës për të mësuar mbi çështjet globale dhe për të kultivuar aftësi të rëndësishme si: hulumtim, shkrim përshkrues dhe avokues, lidership, fjalime publike, arritje e konsensusit, si dhe puna në ekip.
