Kryeministri në detyrë i Kosovës, Albin Kurti, ka marrë pjesë në fillimin e punimeve për ndërtimin e autostradës Shkup-Bllacë, projekt që synon të forcojë lidhjen infrastrukturore dhe ekonomike ndërmjet Kosovës dhe Maqedonisë së Veriut.
Në fjalën e tij, Kurti tha se autostrada, e cila përfshin pesë tunele, tetë ura dhe katër galeri, do të shkurtojë distancën dhe do të lehtësojë qarkullimin e qytetarëve dhe mallrave mes dy vendeve.
“Rëndësia e saj shkon përtej infrastrukturës. Përveç se do të shkurtohet distanca, do të lehtësohet lëvizja dhe do të krijohen mundësi të reja bashkëpunimi për qytetarët dhe ekonomitë e dy vendeve tona”, tha Kurti.
Ai theksoi se në pikën kufitare në Han të Elezit kalojnë rreth 54 mijë maune në vit, apo rreth 150 në ditë, duke nënvizuar rëndësinë e projektit për bizneset dhe tregtinë ndërmjet dy shteteve.
Sipas Kurtit, autostrada është pjesë e rrjetit evropian TEN-T dhe e lidhjes strategjike që përmes Kosovës e afron Shkupin me Prishtinën dhe më tej me rrjetet dhe tregjet evropiane.
Kryeministri në detyrë përmendi edhe projekte të tjera infrastrukturore, përfshirë Linjën 10 hekurudhore dhe projektin Prizren-Tetovë përmes tunelit, duke i cilësuar ato si “ura gjigande të zhvillimit, të bashkëpunimit dhe të afrimit” mes qytetarëve të dy vendeve.
Kurti falënderoi Qeverinë e Maqedonisë së Veriut dhe të gjithë kontribuesit për nisjen e projektit, ndërsa vlerësoi edhe kontributin e koalicionit të partive shqiptare.
“Urime fillimi i punimeve të autostradës së Republikës së Maqedonisë së Veriut, Republikës së Kosovës dhe të gjithë qytetarëve që do ta shfrytëzojnë këtë rrugë”, përfundoi Kurti.
