Zëvendëskryeministri dhe ministri i Punëve të Jashtme Hashim Thaçi është i ftuari i Baton Haxhiut në emisionin Zona B.
Thaçi ka thënë se zgjedhjet e përgjithshme do të mbahen në vitin 2018.
“Thirrjet për dorëheqje të qeverisë s’i kam marrë seriozisht. Zgjedhjet do të mbahen në qershor të vitit 2018”.
“Zgjedhjet mund të mbahen vetëm nëse ne me koalicionin qeverisës nuk do ti kemi numrat në Kuvend, përndryshe jo”.
“Në protestën e fundit opozita nuk kundërshtoi marrëveshjet e lidhura me Serbinë e Malin e Zi, por e kërkoi me dhunë dorëheqjen e qeverisë. Kjo e dëmton shumë vendin dhe imazhin e vendit”.
Thaçi: Republika e Kosovës nuk mbrohet duke gjuajtur institucionet me pushkë
Thaçi thotë se opozita është kundër të gjithëve. Ai thotë se në media kishte pamje ku shihej duke u gjuajtur me pushkë nga protestuesit. Ai thotë se Republika e Kosovës nuk mbrohet duke gjuajtur institrucionet me pushkë.
“Republika e Kosovës nuk mbrohet duke gjuajtur institucionet me pushkë. I keni parë pamjet. Republika nuk mbrohet duke ushtruar dhunë. Atë ditë kemi pasur zëra që nuk përkojnë fare me protestën paqësore. Kemi pasur një dhunë të shfrenuar për përmbysjen e sistemit të Republikës së Kosovës”, ka thënë ai.
Thaçi: Do të zgjedhem President para 5 marsit
Zëvendëskryeministri dhe ministri i jashtëm Hashim Thaçi thotë se ai do të zgjedhet President para 5 marsit.
Thaçi ka thënë se do të respektohet marrëveshja e koaliconit, e cila parasheh që zgjedhja e Presidentit të bëhet para 5 marsit.
“Unë kam deklaruar se do ta respektojmë në tërësi marrëveshjes mes PDK’së dhe LDK’së si dhe partnerëve tjerë të koalicionit. Marrëveshja parasheh zgjedhjen e Presidentit në fillim të vitit 2016. Do të respektojmë marrëveshjen për afatet kohore dhe marrëveshjen tonë politike. Do të shkojmë drejt vendimmarrjes në momentin e duhur. Votimi do të ndodhë para 5 marsit”, ka thënë Thaçi në Zona B të Klan Kosovës.
Ai ka thënë se do të lirohet nga të gjitha postet partiake.
Thotë se ka pasur mundësi shumë herë të zgjedhet President. Ka lavdëruar punën e Presidentes Jahjaga.
“Do të lirohem prej përgjegjësive partiake kur të jetë momenti. Ndihem mirë që kam udhëhequr PDK’në për 17 vite. PDK është partia më e suksesshme e pasluftës. Nuk jam i ekzaltuar të zgjidhem President, kam pasur mundësinë të zgjedhem dy tri herë, por marrëveshja polititike është e tillë”, ka thënë ai.
“Kam pasur kënaqësinë të punoj me të gjithë presidentët e pasluftës dhe nuk është diçka e panjohur për mua. Presidentja Jahjaga ka respektin maksimal të të gjithëve, ka dhënë një mesazh të qartë të punës. Ka qenë një vullnet i plotë i politikës dhe atyre që kanë nënshkruar zgjedhjen e saj si Presidente”, thotë ai.
