Zëvendëskryeministri, njëherësh Ministër i Jashtëm, Hashim Thaçi, ka kritikuar ashpër politikën e Bashkimit Evropian karshi Kosovës, pa harruar edhe ta falënderoj për MSA-në.
Megjithatë, pas publikimit të konkluzioneve të pakos së zgjerimit nga Këshilli i Bashkimit Evropian, Thaçi tha se ndjehet thellë i zhgënjyer për vonesat e pakuptimta të BE-së për liberalizimin e vizave me Kosovën.
“Përderisa i jemi mirënjohës BE-së për nënshkrimin e MSA-së, unë shpreh zhgënjimin e thellë për vonesat e pakuptimta të BE-së për liberalizimin e vizave. Këtë vonesë të BE-së për liberalizimin e vizave për Kosovën e konsideroj provokim të rëndë dhe rezultat të paaftësisë dhe mungesës së vullnetit politik të lidershipit në Bruksel. Për mua është marrëzi nga ana e BE-së, që të mbajë të izoluar kosovarët. Këto vonesa absurde dhe të qëllimshme, jo vetëm që nxisin ekstremizmin në vend, por e rrisin edhe frustrimin tek qytetarët e Kosovës”, ka thënë Thaçi, raporton Koha.net.
Për më tepër, sipas Thaçit, kjo qasje e BE-së është duke rrezikuar të gjitha proceset e rëndësishme në vend, përfshirë edhe dialogun për normalizimin e marrëdhënieve ndërmjet Kosovës dhe Serbisë, zbatimin e marrëveshjeve dhe arritjen e marrëveshjeve të reja.
“Prandaj, konsideroj që BE-ja duhet t’i jap fund këtij trajtimi diskriminues kundër Kosovës dhe kështu të jap ndihmën e saj për paqen dhe stabilitetin në Ballkan”, theksoi zëvendëskryeministri Thaçi.
Përkundër kësaj, ministri i Jashtëm, Hashim Thaçi, thotë se durimi i ynë do të jetë më i fuqishëm se paaftësia e Brukselit.
“Por, Kosova nuk guxon të diskriminohet edhe më tej vetëm për shkak se nuk është si Kolumbia dhe Ukraina. Good luck EU!”, ka përfunduar Zëvendëskryeministri i Parë, Hashim Thaçi.
