Ministri në detyrë i Punëve të Brendshme, Xhelal Sveçla, tha se armatimi në pjesën veriore të vendit është gjetur në 12 lokacione të ndryshme, raporton Ekonomia Online.
Në një konferencë për media nga Qendra e Njësive Speciale “Enver Zymeri” në Mitrovicë, tha se këto armë do të ekzaminohen për t’u përcaktuar përdorimi i tyre.
“Armatimi është gjetur në 12 lokacione të ndryshme. Nga sot, ai do t’i nënshtrohet ekzaminimit dhe analizave të detajuara, me qëllim të përcaktimit të origjinës, përdorimit dhe lidhjeve të mundshme me rastet e hetuara, përfshirë edhe ekzaminimin e së paku 23 personave, por edhe rasteve tjera kriminale”, tha Sveçla.
Sveçla ka deklaruar se sekuestrimi i armatimit dhe zbulimi i tri varrezave masive kanë ardhur si rezultat i një hetimi intensiv të institucioneve të Kosovës.
“Sekuestrimi i këtij armatimi, si dhe zbulimi i tri varrezave masive, ka ardhur si rezultat i një hetimi intenziv të institucioneve tona, të cilave u ka paraprirë shtrirja e sovranitetit të shtetit edhe në veriun e vendit tonë, sundimi i rendit të ligjit, bashkëpunimi ndërinstitucional, si dhe ai qytetar-institucione të Republikës së Kosovës”, ka deklaruar Sveçla.
Ai ka folur edhe për krimet e kryera gjatë luftës së fundit në Kosovë, duke thënë se zbulimi i varrezave masive ka nxjerrë në pah dimensionin e këtyre krimeve.
“Zbulimi i këtyre varrezave masive ka nxjerrë në pah edhe një herë dimensionin e krimeve të kryera gjatë luftës së fundit në Kosovë. Veriu i vendit tonë, përveçse ishte skenë e krimeve të rënda ndaj civilëve shqiptarë, maltretimeve e dëbimeve, është shfrytëzuar edhe për fshehjen e trupave të viktimave pas vrasjeve makabre të kryera nga forcat serbe”, ka thënë ai.
Sipas Sveçlës, Serbia ka investuar vazhdimisht që veriu i Kosovës të mos stabilizohej.
“Mbi këtë fakt, Serbia ka investuar në vazhdimësi që veriu i vendit tonë të mos stabilizohej kurrë, rrjedhimisht të mbetet zonë e sigurtë krimi dhe rezistencë ndaj institucioneve të sigurisë të Republikës së Kosovës”, ka deklaruar ministri në detyrë.
Ai ka theksuar se familjarët e personave të zhdukur me forcë, gati tri dekada pas luftës, ende presin të mësojnë fatin e të dashurve të tyre.
“Gati tri dekada pas luftës, familjarët e personave të zhdukur me forcë presin që ta kuptojnë fatin e më të dashurve të tyre. Kosova me ngulm kërkon përgjegjësi për urdhërdhënësit, organizatorët, dorasit, ata që fshehin trupat e viktimave, si dhe ata që fshehin informata mbi vendndodhjen e viktimave të këtyre masakrave”, ka thënë Sveçla.
Në fund, ai ka dhënë detaje për mbetjet mortore të gjetura në tri lokacionet.
“Siç tashmë është njoftuar për opinionin publik, nga tri lokacione janë gjetur mbetje mortore të 23 personave. Në lokacionin e parë janë gjetur 13 mbetje, në lokacionin e dytë 4 mbetje, dhe në lokacionin e tretë 6 mbetje mortore”, ka deklaruar Sveçla.
