Zëdhënësja e Shtëpisë së Bardhë, Karoline Leavitt, tha të enjten se aktualisht nuk po zhvillohen negociata mes SHBA-së dhe Iranit.
“Nuk po zhvillohen negociata tani dhe kjo do të vazhdojë derisa presidenti të ndiejë se ndoshta ata do të ulen në tryezë në mënyrë kuptimplotë. Ne ende nuk e kemi parë këtë”, i tha Leavitt Fox News.
Zëdhënësja tha se SHBA-ja është e përqendruar në ushtrimin e presionit ekonomik ndaj Iranit, një përpjekje që Shtëpia e Bardhë e ka quajtur “Operation Economic Outcast”. Ajo shtoi se presidenti “vazhdon t’i mbajë të gjitha opsionet në tryezë”.
“Kemi pasur Operacionin ‘Epic Fury’ për ta shkatërruar ushtrinë e tyre. Tani kemi Operacionin ‘Economic Outcast’ për të shkatërruar ekonominë e tyre”, shtoi Leavitt.
Javën e kaluar, Trump tha se administrata e tij ka krijuar një kanal të drejtpërdrejtë komunikimi të fshehtë me Gardën Revolucionare Islamike të Iranit, pretendim që më vonë u mohua nga Teherani.
