Policisë së Kosovës i ka arritur në mesnatë urdhëresa sipas të cilës u ndalohet hyrja në Kosovë të gjithë atyre personave që kanë letërnjoftime nga Serbia, ndërsa jetojnë në Kosovë, transmeton Koha.net raportimin e B92 të Beogradit.
Sipas këtij burimi, drejtori i Zyrës për Kosovën në Qeverinë e Serbisë, Marko Gjuriq, ka thënë se ka spekulime rreth kësaj ndalese, porse po ndiqet situata në pikëkalime.
Tanjugu, agjencia shtetërore e lajmeve të Serbisë, citon Policinë e Kosovës, sipas të cilës në pikëkalimet Jarinje e Bërnjak në veri të Kosovës ende nuk ka filluar zbatimi i kësaj urdhërese.
Gjatë ditës në Leposaviq është paralajmëruar një takim midis kryetarit të kësaj komune, Dragan Jabllanoviq, dhe përfaqësuesve të Policvisë së Kosovës.
Sipas kësaj urdhërese, e cila e nde nuk është zbatuar në veri të Kosovës, ndaj personave me letërnjoftime nga Serbia dhe me vendbanim në Kosovë duhet të zbatohet Ligji për të huajt.
Drejtori i Zyrës për Kosovën në Qeverinë e Serbisë, Marko Gjuriq, ka thënë se po e ndjekin situatën në pikëkalimet me Kosovën pas spekulimeve, siç citohet të ketë thënë ai, se qytetarëve me letërnjoftime të lëshuara nga MUP-i i Serbisë nuk po u lejohet hyrja në “krahinën jugore serbe”.
“Është e vërtetë se ka disa spekulime rreth ndryshimit të regjimit në pikëkalimet e integruara. Po e ndjekim situatën me kujdes dhe varësisht nga zhvillimet do të reagojmë gjatë ditës. Të jeni të sigurt se nëse do të ketë farë ndryshimesh që nuk janë në përputhje me marrëveshjet, Serbia, sikundër edhe deri më tash, nuk do të heshtë dhe se do të mbrojmë interesat e qytetarëve tanë”, i ka thënë Gjuriq RTS-së.
