Projektligji për Forcat e Armatosura është paraparë nga Qeveria e Kosovës që të procedohet në Kuvend me 30 prill të këtij viti. Megjithëse nuk është e qartë se si do të arrihen votat për ta shndërruar Forcën e Sigurisë së Kosovës në Ushtri.

Lista Serbe deri më tani vazhdimisht e ka bërë të ditur se ata nuk do ta japin votën e tyre për ushtrinë e Kosovës, ani pse e njëjta parashihet të jetë multientike.

Për Express, nga Qeveria e Kosovës thonë se gjithçka që ka të bëjë me FSK’në, ekzekutivi është duke biseduar me të gjitha palët, përfshirë edhe vendet mike.

“Për të gjitha temat që ndërlidhen me FSK-në, Qeveria është duke punuar ngushte me te gjitha palët duke përfshirë edhe partnerët ndërkombëtarë e veçanërisht Shtetet e Bashkuara te Amerikës”, kanë thënë ata.

Sidoqoftë, në kohën kur Presidenti Hashim Thaçi me ngulm insistonte që ushtria të bëhej sipas ligjit pasi përmes ndryshimeve kushtetuese ishte e pamundshme, ndërkombëtarët bënin thirrje që një veprim i tillë mos të ndodhte.

Megjithëse, nga Qeveria thonë për Express se kjo do të ndodh në kuadër te veprimeve te koordinuara dhe bashkërendimit dhe se në afatin optimal do te vendoset për mënyrën e transformimit te FSK-së.

Kohë më parë, Ambasadori amerikan, Greg Delawie, kishte paralajmëruar pasoja për Kosovën nëse ushtria bëhej sipas ligjit dhe jo ndryshimeve kushtetuese. Pas shumë thirrjeve, Presidenti Thaçi ishte tërhequr nga nisma e tij.

Por, gjatë vizitës në Kosovë, Ndihmës Sekretari Amerikan i Shtetit Wess Mitchell tha se askush s’ka veto në sigurinë e Kosovës. Të njëjtën porosi ai e dërgoi edhe në Beograd duke thënë se Kosova ka të drejtë ta ketë ushtrinë dhe se kjo nuk përbën kërcënim për askënd.

Edhe pse e përsërisin vazhdimisht se Kosova shpejt do ta ketë ushtrinë e saj, zyrtarët në Prishtinë e saj, hezitojnë të japin afate për këtë.

Hashim Thaçi javën e kaluar gradoi disa gjeneralë dhe shtoi se kjo po bëhet në prag të formimit të ushtrisë./D.K/GazetaExpress