Nga publikimi i bisedave të përgjuara telefonike, me të cilat opozita maqedonase po tenton të zbardhë aferat korruptive të Qeverisë së Nikolla Gruevskit, po zbulohen edhe fyerjet e rënda ndaj shqiptarëve, që kanë përdorur pushtetarët maqedonas gjatë komunikimit mes tyre.
Nga bisedat e përgjuara midis ministrave maqedonas, ata dëgjohen duke përdorur termin përbuzës “shiptari” kur flasin për shqiptarët.
Në një nga bisedat e publikuara së fundmi, që sipas liderit të opozitës Zoran Zaev zhvillohet mes kryetarit të Parlamentit, Trajko Veljanovski, dhe ministres së Brendshme, Gordana Jankullovska, këta të fundit në mënyrë ofenduese i quajnë “indianë” deputetët shqiptarë të Bashkimit Demokratik për Integrim.
Ja biseda mes Gordana Jankullovskës dhe Trajko Veljanovskit
Zëri 1: Me indianët e kemi pastruar?
Zëri 2: Po, po. Me indianët kryesorë.
Zëri 1: Ë…?
Zëri 2: Them me indianët kryesorë është pastër, tani me tanët. Me tanët…
Deputetët e BDI-së shprehen të ofenduar, nga – siç thonë – niveli i ulët i komunikimit mes pushtetarëve maqedonas, me të cilët bashkëqeverisin.
“Sa i përket mënyrës së komunikimit të atyre që dëgjohen në komunikim, mendojmë se është çështje e etikës individuale, njerëzore dhe nivel i ulët i komunikimit. S’do mend, që ne nuk e komentojmë dhe nuk pajtohemi me atë nivel komunikimi. Ne si deputetë jemi angazhuar të përmbushim përcaktimet tona programore dhe të kryejmë punën tonë, që na e kanë besuar zgjedhësit tanë”, tha Talat Xhaferi, koordinator i grupit parlamentar të BDI-së.
Pas publikimit të bisedës ku fyhen deputetët, në rrjetet sociale kanë filluar të shpërndahen fotografi të ndryshme ku lideri i BDI-së, Ali Ahmeti, dhe bashkëpunëtorët e tij shihen të veshur si indianë.
Ndërkohë, në një tjetër material që u publikua më parë, ministrja e Brendshme Gordana Jankullovska dëgjohej duke thënë se, nëse është e nevojshme, do t’i kapte prej fyti shqiptarët e Kumanovës për të penguar fitoren e kandidatit të opozitës në këtë qytet, në zgjedhjet lokale të vitit 2013. / Top Channel
