Një pjesë e madhe e përdoruesve të Android po heqin dorë nga pajisjet e tyre për një iPhone. Gjatë eventit të zhvilluar dje, shefi ekzekutiv i Apple-it, Tim Cook, zbuloi se rreth 30% e blerësve të rinj të iPhone-ve kanë pasur më parë një telefon me sistemin Android të Google-it. Vetëm një e treta e përdoruesve aktualë të iPhone-it kanë ndërruar pajisjen e tyre me një iPhone të ri.
Kompania shiti 48.04 milionë iPhone në tremujorin e katërt të vitit 2015, nga 39.27 milionë njësi që shiti në të njëjtin tremujor të vitit të kaluar. Kjo do të thotë se 14.4 milionë përdorues të Android kanë ndërruar pajisjen e tyre me një iPhone.
Duhet të theksojmë se Apple iu është afruar gjithmonë e më shumë përdoruesve të Android duke ua bërë më të lehtë kalimin tek iOS. Përmendim këtu aplikacionin “Move to iOS” tek iOS 9, që ndihmon përdoruesit e Android të transferojnë të gjitha kontaktet, fotot, skedarët tek iOS.
