Arritja e marrëveshjes për koalicion ndërmjet Lidhjes Demokratikë të Kosovës dhe Aleancës Kosova e Re për balotazhin e 19 nëntorit në Komunën e Vushtrrisë, ku do të garojnë Ferit Idrizi nga PDK dhe Xhafer Tahiri nga LDK, ka prodhuar pakënaqësi në radhët e AKR-së.
Arta Imeri, kryetarja e Forumit të Gruas së AKR-së dhe Faton Gubetini, kryetar i Degës IV në Nedakoc, sot zyrtarisht kanë dalë në mbështetje të kandidatit të PDK-së, Ferit Idrizi, i cili është i pari në garën e 22 tetorit.
Arta Imeri, e cila është zgjedhur edhe asambliste e AKR-së më 22 tetor, tha se strukturat e degës së AKR në Vushtrri nuk e mbështesin koalicionin me LDK-në, i cili sipas saj është arritur nën diktat dhe nuk e përfaqëson vullnetin e strukturave dhe elektoratit të AKR.
Ajo tha se shumica e strukturave të AKR në Vushtrri do ta mbështesin dhe votojnë Ferit Idrizin për kryetar.
Në pritjen e organizuar nga PDK, në Vushtrri, kryetari i këtij subjekti, Kadri Veseli, tha se PDK është shtëpi e të gjithë qytetarëve të Kosovës dhe se me Ferit Idrizin kryetar, në katër vjetët e ardhshëm, vushtrriasit do të jenë dëshmitarë të zhvillimit të hovshëm ekonomik të komunës dhe rritjes së mirëqenies ekonomike të tyre, përcjell ksp.
“Sot i uruam mirëseardhje të ngrohtë Artës dhe Fatonit për ta mbështetur Ferit Idrizin dhe PDK-në në Vushtrri. Pa dyshim se edhe në ditët në vijim shumë personalitete të shquara nga të gjitha subjektet do t’i bashkohen platformës tonë fituese. Feriti nuk është politikan dhe platforma e tij është një platformë unifikuese, një program që në epiqendër ka të gjithë vushtrriasit pa dallim”, ka thënë Veseli.
Nga ana tjetër, kandidati për të parin e Vushtrrisë, Ferit Idrizi, ka falënderuar Arta Imerin dhe strukturat e AKR-së për mbështetjen në balotazh. Ai tha se strukturat e AKR-së që po i japin mbështetje në fitoren e 19 nëntorit do të vazhdojnë të jenë edhe pjesë e qeverisjes së re të PDK-së në Vushtrri.
