Qytetarët të cilët kanë vendosur që ta ndjekin që nga fillimi programin festiv në sheshin “Zahir Pajaziti” në kryeqytet, duket të jenë shumë të pakët në numër. Koncerti i organizuar nën patronatin e kryetarit të komunës së Prishtinës, Shpend Ahmeti, filloi me një orë vonesë.
Ky koncert parashihej të filloj në orën 20:00.
Këtë koncert, para një publiku shumë të vogël në numër, e filloi grupi “Seed”, i cili do të kujdeset për argëtimin e qytetarëve deri në orën 23:30, raporton ekipi i KosovaPress-it.
Sipas organizatorëve të këtij programi, pas përfundimit të performancës të këtij grupi në orën 23:00, pritet që të fillojë programi kryesor festiv.
Në skenën e vendosur për programin festiv të vitit të ri do të ngjiten edhe shumë artist të tjerë, të cilët në ora 00:00 do të shoqërohen edhe nga kryetari i Prishtinës, Shpend Ahmeti, i cili do ta presë Vitin e Ri së bashku me qytetarët.
Grupet që janë paraparë të performojnë në këtë koncert janë: Shoqata e Rapsodëve “Hivzi Sylejmani”, Seed, Lovers, Aragona Band, Denik Prizreni, Xuxi, Offchestra, Etno Engjujt, Dj Gamble./KosovaPress/
