Behgjet Pacolli thotë se vonesa për liberalizimin e vizave po përpiqet të kthehet në histeri antieuropiane.
Në një shkrim në Facebook, ai thotë se klasa politike nuk ka punuar asgjë për këtë proces, në asnjë nivel.
Ai thotë se mosrealizimi i detyrave ndaj BE’së, është bilanci në sy të të gjithëve.
Shkrimi i plotë i Pacollit në Facebook:
Nga njerëz të qeverisë të gjithë niveleve, vonesa për liberalizimin e vizave Kosovës, po përpiqet të kthehet në histeri antieuropiane. Po përpiqen të manipulojnë qytetarin duke i thënë se Europa na ka inat, etj, marrëzi si këto. Kjo sjellje është e padrejtë, është kalim përgjegjësish tek dikush tjetër që ka hallet dhe telashet e veta.
Liberalizimi i vizave nuk është në rastin e Kosovës, një proces teknik.Këta njerëz,a e dinë që nuk i kanë kryer detyrimet e tyre si udhëheqës të shtetit? Për këto mosrealizime të detyrave ndaj BE, është bilanci në sy të të gjithëve.
Jo thjesht metaforikisht liberalizimi i vizave është një proces politik në rastin tonë dhe është i lidhur me CILSINë e qeverisjes, me imazhin e vendit tonë, me lidhjet e qeverisjes me krimin, me shantazhin, me dukuri kriminale.
Madje Bashkimi Europian kërkon arrestime të nivelit të lartë të atyre që janë përfshirë në këtë dukuri. A është përndjekur kush në këto nivele për krim, korrupsion, shantazh?
Ky proces liberalizimi ka afatet e veta, ka detyrimet e veta. A i kemi respektuar ne afatet e detyrimet e këtij procesi?
Sigurisht që jo dhe për këtë nuk e ka fajin Bashkimi Europian!
Faji është i njerëzve në majet e qeverisë të cilët, pos retorikës bosh, përtacësisë, për shkak të mungesës së vullnetit dhe profesionalizmit në punë si dhe (ajo që është më e shëmtuara) bashkëpunimi me krimin e organiziar,shantazhimin e qytetarëve te vet,korripcionin,abuzimin më të drejtat e njeriut dhe pronës private.
Këto janë arsyet që sot kosovarët paguajnë për fajin e juaj,qeveritarë të Kosovës!
A jeni ju që keni bllokuar shtetin e Kosovës ?Si mund të pranojë Bashkimi Europian një vend që kalon nga bllokada politike, në një bllokadë tjetër politike? Vjet ata që ishin në opozitë dhe sot janë në qeverisje, krijuan një bllokadë politike. Tani po përjetojmë një bllokadë tjetër, shkatërrimtare për imazhin tonë. Pikërisht këto bllokada, mungesa e shpresës nxitën mijëra qytetarë të linin vatrat e tyre dhe të mësynin Gjermaninë dhe vendet e tjera. A mund të pranojë kaq kollaj Bashkimi Europian një vend që ka shkallë kaq të lartë emigracioni të sforcuar, emigracioni klandestin për shkak të cilësisë së qeverisjes? Unë them se jo, dhe për këtë e ka , prapë fajin qeveria jonë dhe jo BE.
Ndaj e ftoj qeverinë të heqë dorë nga nxitja e frymës antieuropiane në gjirin e popullatës tonë. Qytetari ynë e ka ndërtuar një pjesë të mirë të mirëqenies nga ndihma e bashkatdhetarëve tanë të mërgatës kudo nëpër Europë.
Hiqni dorë nga inatet,hiqni dorë nga mbështetja e korrupcionit, hiqni dorë nga favoritizmat primitivë familjarë,partiakë e klanorë, punoni sinqerisht e me shpirt për interesat e shtetit dhe qytetarit, hapni perspektivë për punëtorin,mos e shantazhoni atë, krijoni kushte për zhvillim ekonomik (këtu keni dështuar në mënyrë katastrofike), respektoni të drejtat e çdo individi dhe respektoni pronën private të seicilit.
Vetëm kështu ju mundeni ta drejtoni Kosovën drejt Europës e kursesi me këtë cka keni treguar deri tani!
