Kandidatja e LDK-së për kryeministre, dr. Vjosa Osmani, në vizitën në Komunën e Klinës u shpreh e lumtur për bashkëveprimin mes demokracisë qytetare, të përfaqësuar nga LDK-ja dhe kristiandemokracisë, të përfaqësuar nga PSHDK-ja.
“Jemi të lumtur që po e jetësojmë koalicionin e vlerave evropiane. Demokristianët janë rikthyer natyrshëm në LDK – adresën e vetme të besimit të qytetarëve të Kosovës”, tha dr. Osmani.
“LDK-ja synon që këtë besim qytetar ta kthejë në besim për jetësim të shtetit tonë”, ka thënë dr. Osmani, në vizitën që e bëri në Komunën e Klinës.
Për këtë, sipas znj. Osmani, duhet guxim intelektual, të cilin LDK-ja e ka dëshmuar në çastet më të vështira.
“Në momentet më vendimtare ne e kemi pasur guximin që të përballemi me sfida dhe i kemi fituar ato”, tha dr. Osmani.
Dr. Osmani nënvizoi se Klina në momentet më vendimtare, në vitet e mobilizimit të madh të viteve ’90, ka ditur të rreshtohet pas Presidentit historik, dr. Ibrahim Rugova.
“Sot, si në vitet ’90, na duhet rimobilizim nacional për ta rimëkëmbur shtetin e Kosovës”, theksoi në fund znj. Osmani.
“Pas 20 vjetësh zvarritjeje e keqpërdorimesh, ka ardhur koha që me guxim intelektual e besim në bashkëveprimin me qytetarët, republikën t’ua kthejmë qytetarëve, atyre që nuk rreshtën së besuari në projektin tonë”, u shpreh në fund të këtij takimi znj. Osmani./infosot/
