Një i plagosur në Ferizaj

E publikuar: 06/03/2016 18:33
Rreshtat+- AShkronjat+- Printo

Dy persona të armatosur dhe të maskuar e kanë plagosur ferizajasin M.K. në dyqanin e tij pasi ky nuk kishte pranuar t’u japë paratë që i kërkonin.

M.K. nga Ferizaj ishte duke punuar në dyqanin e tij, në rrugën “Rexhep Bislimi”, në Ferizaj, kur dy persona të armatosur e të maskuar hynë për ta grabitur.

Edhe pse i gjendur nën kërcënimin e armëve M.K. nuk pranoi t’u japë paratë grabitësve, ndërsa, duke u larguar nga lokali, njëri nga të maskuarit e qëllon me armë në këmbë.

Sipas njoftimit të Policisë në Ferizaj, ngjarja ka ndodhur rreth orës 8:15 të mbrëmjes.

Të plagosurit i është dhënë tretmani i duhur mjekësor në emergjencën e Ferizajt dhe i njëjti është jashtë rrezikut për jetë.

Hetimet lidhur me zbardhjen e këtij rasti janë duke vazhduar, mirëpo ende nuk është arrestuar asnjë person, ndërsa policia njofton se në vendin e ngjarjes kanë gjetur një gëzhojë te kalibrit 7.65 mm.