Asnjë surprizë në ditën e tretë të Mastersit të Cincinnatit. Të gjithë emrat e mëdhenj arritën të kualifikoheshin më tej, madje përvec Stan Wawrinkas asnjëri nuk vuajti për të avancuar në raundin e tretë. Novak Djokovic numri 1 i Botës, i cili këtë vit në Cincinnati synon triumfin e tij të parë, e nisi turneun me një fitore të thjeshtë ndaj francezit Benoit Paire. Tenisti serb e kaloi kundërshtarin e tij në 1 orë e 40 minuta lojë, 2-0 me sete me shifrat 7-5, 6-2. Në raundin e tretë rivali i Djokovic do të jetë belgu David Goffin që nga ana e tij eliminoi, spanjollin Fernando Verdasco. Edhe 2 herë kampioni i Mastersit të Cincinnatit dhe njëkohësisht numri 2 i Botës, britaniku Andy Murray u kualifikua pa vështirësi për më tej. 28-vjecari skocez eliminoi në 2 sete me shifrat 6-4, 7-6 amerikanin Mardy Fish, me Murray-in që tashmë duhet të masë forcat me bullgarin Grigor Dimitrov.
Thjeshtë një shëtitje rezultoi sfida e raundit të dytë kundër francezit Jeremy Chardy për spanjollin Rafael Nadal. Tenisti iberik u imponua në 2 sete ndaj kundërshtarit të tij me rezultatin 6-3, 6-4. Në raundin e 4-t Nadal do të ketë përballë bashkëkombasin Feliziano Lopez. Vuajti jo pak Stan Wawrinka për të nxjerrë jashtë turneut amerikan, adoleshentin kroat Borna Coric, i cili konsiderohet nga të gjithë si e ardhmja e sportit të tenisit. 2-1 me sete me shifrat 3-6, 7-6, 6-3 ishte rezultati i sfidës në favor të zviceranit që qëndroi në fushë për plot 2 orë 19 minuta për të thyer rezistencën e Coric. Avancuan më tej edhe Richard Gasquet, Kevin Anderson dhe Tomy Robredo që mundën respektivisht Kokkinakis, Sock dhe Querrey.
Në kategorinë e femrave e nisi me këmbën e mbarë Mastersin e Cincinnatit, numri 1 i Botës Serena Williams. Amerikanja mposhti pa shumë vështirësi 2-0 me sete bullgaren Pironkova./ss/
