Faktori ndërkombëtar mund të jetë i detyruar sërish të shtojë trysninë mbi liderët dhe institucionet e Kosovës, me kërkesën që të përshpejtohet themelimi i Gjykatës Speciale për Krime Lufte.
Zvarritjet e procedimit të amendamentit kushtetues për themelimin e kësaj Gjykate, nga analistët po shihen si indikacione se koalicioni qeverisës nuk ka arritur ende të sigurojë shumicën e nevojshme të votave në Kuvend për të miratuar ndryshimet e nevojshme kushtetuese.
Artan Muhaxhiri, analist politik, mendon se koalicioni qeverisës i Partisë Demokratike të Kosovës dhe Lidhjes Demokratike të Kosovës, ndodhet mes presioneve të brendshme dhe atyre nga jashtë.
Fillimin e zgjidhjes ai e parasheh te nisja e takimeve me përfaqësuesit ndërkombëtar, siç ka ndodhur edhe me proceset tjera politike kur vendimet hasnin në nyje dhe ngërçe politike.
“Tani unë pres që të fillojnë takimet nëpër ambasadat në Prishtinë, më konkretisht në ambasadën amerikane, në mënyrë që të merret miratimi i Kuvendit të Kosovës për themelimin e Gjykatës Speciale”, ka thënë Muhaxhiri për Radion Evropa e Lirë.
Përveç anës së presionit ndërkombëtar dhe mungesës së mbështetjes nga opozita, krerët e koalicionit qeverisës, kryeministri Isa Mustafa dhe zëvendësi i parë i tij Hashim Thaçi, sipas Artan Muhaxhirit, ndodhen edhe mes trysnive të brendshme nga disa deputetë të të dyja partive të cilët këmbëngulin se nuk do ta miratojnë themelimin e kësaj Gjykate.
Ganimete Musliu është deputete e Partisë Demokratike të Kosovës e cila ka deklaruar haptas se nuk do ta mbështes këtë Gjykatë.
Në një prononcim për Radion Evropa e Lirë, Musliu ka thënë se nuk e sheh si parimore që të themelohet një gjykatë që do të merrej me trajtimin e krimeve të supozuara.
“Kjo gjykatë tashmë ka humbur kuptimin e saj. Nuk është parimore të themelohet një gjykatë për krimet e supozuara, kur ne i kemi krimet e faktuara në Kosovë që kanë ndodhur në luftën e fundit dhe askush nuk është përgjigjur për ato krime. Kështu që e konsideroj që kjo gjykatë është e pakuptimtë”, është shprehur Musliu duke rikonfirmuar votën e saj kundër themelimit të Gjykatës Speciale.
Themelimi i Gjykatës Speciale për Krime Lufte, fillimisht kalon përmes amandamentimit të Kushtetutës së Kosovës me dy të tretat e votave të të gjithë deputetëve dhe dy të tretat e votave të deputetëve nga radhët e pakicave.
Lista Serbe përbën shumicën e deputetëve nga radhët e minoriteteve, andaj, pa votat e këtij subjekti politik, nuk do të mund të themelohej kjo gjykatë.
Artan Muhaxhiri beson se Lista Serbe, si një eksponent politik i krijuar nga Qeveria e Serbisë do të mund të bindej vetëm nëse faktori ndërkombëtar do të ushtronte presion fillimisht mbi Beogradin.
“Refuzimi i Listës Serbe do të vazhdojë, por vetëm deri në një pikë kur presioni ndërkombëtar ndaj Beogradit, i cili është urdhërdhënësi kryesor i Listës Serbe në Kosovë, do të bëhet aq i madh sa që nuk do të mund t’i thotë jo as Brukselit e as Uashingtonit”, ka theksuar Muhaxhiri.
Selia e Gjykatës Speciale për Krime Lufte pritet të jetë jashtë Kosovës.
Në përbërjen e saj do të ketë prokurorë e gjykatës ndërkombëtar.
Ajo do të hetojë dyshimet e supozuara në raportin e Këshillit të Evropës lidhur me pretendimet e senatorit zviceran Dick Marty për trafik organesh të disa civilëve serbë nga ana e disa ish-pjesëtarëve të Ushtrisë Çlirimtare të Kosovës të cilat u hetuan më pas nga një Task Forcë speciale ndërkombëtare./REL/
