BE-ja dhe Mali i Zi mbyllën përkohësisht negociatat e pranimit për politikën ekonomike dhe monetare, kapitulli 17, statistikat, kapitulli 18 dhe politikën sociale dhe punësimin, kapitulli 19.
Komisionerja Evropiane për Zgjerimin, Marta Kos, tha se reformat në kuadër të tre kapitujve të mbyllur përkohësisht sjellin përfitime të prekshme për Malin e Zi. Ndërkohë, Kos theksoi gjithashtu se këtë të martë do të mbyllet edhe një kapitull me Shqipërinë.
Në një konferencë për shtyp, kryeministri Milojko Spajic tha se mbyllja e tre kapitujve kishte krijuar një kornizë të qartë për stabilitetin ekonomik dhe monetar.
“Jam krenar që në Konferencën e dytë Ndërqeveritare për Malin e Zi, të mbajtur nën presidencën irlandeze, mbyllëm përkohësisht tre kapituj të tjerë negociues. Me 21 kapituj negociues të mbyllur përkohësisht, Mali i Zi po bën përparim të vazhdueshëm drejt mbylljes së të gjithë kapitujve të mbetur. Zgjerimi është një domosdoshmëri gjeopolitike për BE-në dhe mbetet një përparësi kryesore e presidencës irlandeze”, tha Thomas Byrne, Ministër i Shtetit për Çështjet Evropiane dhe Mbrojtjen e Irlandës, në emër të presidencës irlandeze të Këshillit të BE-së.
Këto mbyllje të përkohshme vijnë pas konferencës së mëparshme të anëtarësimit më 14 korrik 2026, e cila mbylli përkohësisht kapitujt 8 mbi politikën e konkurrencës dhe 29 mbi bashkimin doganor.
Monitorimi i progresit në përafrimin me dhe zbatimin e acquis të BE-së do të vazhdojë gjatë gjithë negociatave.
Mali i Zi ka hapur të 33 kapitujt negociues në negociatat e pranimit në BE. Me mbylljet e sotme, një total prej njëzet e një prej këtyre kapitujve janë mbyllur përkohësisht . Sipas parimeve negociuese të miratuara nga Konferenca e Pranimit, marrëveshjet e arritura gjatë negociatave për kapituj të caktuar nuk mund të konsiderohen si përfundimtare derisa të arrihet një marrëveshje e përgjithshme për të gjithë kapitujt.
BE-ja, nëse është e nevojshme, mund t’u rikthehet këtyre kapitujve në një moment të përshtatshëm.
“Mbrëmë, Mali i Zi mbylli edhe tre kapituj të tjerë të negociatave. Sot, do të mbyllim një kapitull me Shqipërinë dhe do të hapim nga dy grupkapituj negociues me Ukrainën dhe Moldavinë.
Ndërsa procesi i zgjerimit po përshpejtohet, do të diskutojmë me shtetet tona anëtare se si të sigurohemi që Bashkimi ynë të bëhet më i fortë, teksa zgjerohet. Për këtë arsye, kemi propozuar mekanizma më të fortë mbrojtës për garantimin e shtetit të së drejtës dhe reforma për një Bashkim më efikas.
Sot do të mirëpresim gjithashtu vendet kandidate në Qendrën Evropiane për Rezistencën Demokratike. Shumë prej vendeve kandidate janë përballur prej vitesh me kërcënime hibride. Përvoja e tyre mund të na ndihmojë të mbrojmë demokracinë në të gjithë Evropën”, është shprehur Kos.
