Pas shtëpive të Bashkim Smakajt, ish-kreut të AKI-së dhe Blerim Shalës, ish-këshilltarit të ish- presidentit Thaçi, Specialja ka nisur bastisjen e shtëpisë edhe të Artan Behramit, gjithashtu ish-këshilltar i ish-presidentit.
Burime të lajmi.net thonë se bastisja ka nisur në orët e hershme të mëngjesit.
Nuk dihet arsyeja pse ka ndodhur një gjë e tillë.
Sidoqoftë, mediat kanë raportuar se shtysë për bastisjet mund të jetë një status i Behramajt ku ai kritikon Specialen, duke e quajtur “fashiste”.
Ja çka shkruante dje Behramaj:
Gjykata Speciale është fashiste sepse përndjek, arreston dhe dënon vetëm shqiptarët.
Prokuroria është në panik! Po humb çdo betejë juridike! Ndërsa, gjykata në përpjekje për të ndihmuar prokurorinë, seancat tragjike-komike po mundohet t’i mbulojë me spektakle.
Bastisja e shtëpive të kolegëve, Blerimit dhe Bashkimit, është skandaloze dhe e paprecedent!
Blerim Shala ka qenë pengesë vetëm për regjimin e Millosheviqit dhe ky regjim e kishte arrestuar atë disa herë.
Për katër dekada, Shala ka qenë njëra ndër figurat intelektuale që ka dhënë një kontribut të pashlyeshëm në rrugën për liri, pavarësi dhe shtetndërtim!
Ndërsa, Bashkim Smakaj është ndër njerëzit më profesionist që njoh në fushën e sigurisë, njeri që ka ndërtuar shumë institucione të sigurisë në Kosovë nga themelet!
Tani kjo qasje e prokurorisë është një dëshmi e qartë se ka një tendencë për të njollosur të gjithë shqiptarët që kanë dhënë kontribut për liri dhe shtetndërtim.
Unë dhe kolegët e mi që kemi pasur nderin të bashkëpunojmë me presidentin Thaçi, nuk frikësohemi nga trokitjet e kësaj prokurorie në dyert e shtëpive tona.
Ata nuk kanë policë për të bastisur të gjithë shqiptarët, ata nuk kanë prokurorë për të akuzuar të gjithë shqiptarët, ata nuk kanë burgje për të mbajtur të gjithë shqiptarët, që mbrojnë luftën çlirimtare të Kosovës!.
