Dhjetë ditë pas vrasjes trupat e nëntë kosovarëve, që morën pjesë në konfliktin e Kumanovës, pritet të sillen në Kosovë gjatë ditës së sotme (e enjte).
Për “riatdhesimin” e kosovarëve ka konfirmuar Prokuroria në Shkup përmes një përgjigjeje të kthyer në adresë të Ministrisë së Punëve të Jashtme të Kosovës.
Kjo e fundit kërkoi listën me personat e vdekur, si dhe informacione të detajizuara për mënyrën se si do të kthehen trupat e të vrarëve në Kosovë.
Se një përgjigje konform kërkesës së Prokurorisë është kthyer në MPJ, e ka konfirmuar zëdhënësi i Ministrisë së Drejtësisë në Maqedoni, Valdet Xhaferi, i cili nuk ka dhënë detaje rreth përmbajtjes së përgjigjes duke u arsyetuar se përgjigjja i është dorëzuar Ambasadës së Kosovës në Shkup, shkruan ‘Zëri’.
I njëjti një ditë më parë ka konfirmuar se Kosova ka kërkuar nga Maqedonia “sigurimin e listës së personave të vdekur, sigurimin e mundësisë që një grup ekspertësh nga Kosova të bëjnë obduksionin e trupave të vdekur, si dhe detaje që kanë të bëjnë me transportimin e trupave të vdekur nga Maqedonia në Kosovë”. /Zëri/
