Kreu i “Aleancës Kuq e Zi”, Kreshnik Spahiu, në një intervistë për emisionin “Info – Box” të RTV Dukagjini, ka theksuar se ata si aleancë kanë dorëzuar në Parlamentin e Shqipërisë një projekt – rezolutë për Kosovën.
Sipas tij, Kosova meriton të ketë kujdes nga ana e shtetit shqiptar, duke shtuar se “në mbështetje të nenit 8 të Kushtetutës së Republikës së Shqipërisë, shteti amë Shqipëria e ka për detyrim mbrojtjen e interesave të shqiptarëve jashtë kufirit të shtetit shqiptar”.
“Marrëveshjet në mes shqiptarëve dhe serbëve, të cilat mund të quhen lirisht tashmë famëkeqe, kanë çuar në dëmtim të interesave kombëtare të shqiptarëve në Kosovë. Askush nuk e ka ekskluzivitetin, as Qeveria e Kosovës – as Hashim Thaçi e as Isa Mustafa, që t’i dëmtoj pjesë të territorit të Kosovës, sepse nuk ua ka lënë baba me trashëgimi këto territore as Thaçit dhe as Mustafës, por për atë është derdhur gjaku”, ka thënë Spahiu.
Ai më tutje ka theksuar se “ne kërkojmë qartazi dhe prerazi që duhet të lirohen të burgosurit politik në Kosovë. Kosova ka nevojë të burgosen qeveritarët e saj të korruptuar, duke shtuar se “detyrim i prokurorisë së Kosovës është të tregoj që është e pavarur. Burgosjet politike janë strategji serbe”.
