Në Pallatin e Drejtësisë së Bullgarisë, Instituti Gjyqësor i Kosovës dhe Instituti Nacional i Drejtësisë së Bullgarisë, nënshkruan memorandum bashkëpunimi.
Ky memorandum u nënshkrua nga Drejtori i Instituti Gjyqësor të Kosovës, Lavdim Krasniqi dhe ai i Bullgarisë, Dragomir Yordanov.
Kështu së paku thuhet në një komunikatë për media të Institutit Gjyqësor të Kosovës, ku thuhet se pas nënshkrimit të memorandumit, drejtori i Institutit Gjyqësor të Kosovës, Lavdim Krasniqi tha se me nënshkrimin e këtij memorandumi po konkretizohet bashkëpunimi mbi 10 vjeçar që ekziston në mes të dy instituteve. Ai shtoi se ky memorandum do të fuqizojë dhe do të zgjerojë fushat e bashkëpunimit ndërmjet dy instituteve ne shërbim të ngritjes se kapaciteteve të gjyqësorit dhe prokurorisë se dy vendeve.
Drejtori Krasniqi, tha se instituti dhe ekspertet e drejtësisë së Bullgarisë kanë meritë të madhe në zhvillimin e Institutit Gjyqësor të Kosovës dhe se, sipas tij, çdo herë kanë qenë të gatshëm për të mbështetur sistemin e drejtësisë së Kosovës.
Në anën tjetër, drejtori i Institutit Nacional të Drejtësisë së Bullgarisë, Dragomir Yordanov, tha se bashkëpunimi në mes të dy institucioneve i cili vazhdon që një kohë të gjatë, sot me nënshkrimin e memorandumit bashkëpunimi po forcohet. Ai tha se Republika e Kosovës është partnere e rëndësishme e Bullgarisë dhe shtoi se përvojat që ka Bullgaria në sistemin e drejtësisë, do t’i ndajë me Kosovën.
Në ceremoninë e nënshkrimit të memorandumit të bashkëpunimit kanë marrë pjesë edhe Kryetari i Gjykatës Supreme të Bullgarisë, Llozan Panov, ambasadori i Republikës së Kosovës në Bullgari, Shpend Kallaba dhe Minister-këshilltar në Ambasadë e Kosovës në Bullgari, Fitim Gllareva.
Nënshkrimi i këtij memorandumi të bashkëpunimit është bërë gjatë një programi praktik shkëmbimi që po zhvillohet në institucione të ndryshme të gjyqësorit dhe prokurorisë në Bullgari, i cili është organizuar nga Instituti Gjyqësor i Kosovës, ai i Bullgarisë dhe Projekti i BE-së “Mbështetje e reformës se edukimit gjyqësor në Kosovë”. Në këtë program po marrin pjesë prokurorë, gjyqtar dhe staf administrativ nga sistemi prokurorial dhe ai gjyqësor i Kosovës.
