Kryeministri i Kosovës Isa Mustafa i ka ftuar sot gazetarët në një koktej fundviti për t’i falënderuar për bashkëpunimin gjatë një viti.
Edhe kësaj here, transmeton kp kryeministri Mustafa nuk mbajti fjalime politike por shtoi se ka lexuar dhe analizuar të gjithë artikujt që janë publikuar në medie.
“Ne po përfundojmë një vit qeverisje dhe një vit të rëndësishëm të bashkëpunimit me ju. Kemi pas një përcjellje shumë të rëndësishme me të gjitha mediet tona.
Kemi pas opinione, analiza me të cilat ose kemi mundur të pajtohemi ose të mos pajtohemi, por, ajo çka është e vërteta që me shumë kujdes i kemi dëgjuar dhe i kemi lexuar dhe me kujdes pastaj edhe i kemi trajtuar në sjelljen tonë qeverisëse sepse është më rëndësi shumë të madhe që mediet ta bëjnë punën e tyre në mënyrë të pavarur” , tha Mustafa.
Ai ka përshëndetur të gjithë dhe ka falënderuar për bashkëpunimin gjatë një viti, duke ftuar që bashkëpunimi të vazhdojë edhe më tutje vetëm në të mirë të vendit.
Mustafa me një urim për shëndet të mirë dhe mirëqenie ka uruar gazetarët dhe ka përmbyllur fjalimin e tij duke vazhduar më tutje të takojë secilin veç e veç.
