Ka mbetur më pak se një javë kur Lidhja Demokratike e Kosovës do të mbajë Kuvendin e saj zgjedhor. Deri më tani tre kandidat janë në garë për të parin e LDK-së. Pikërisht për këtë njohësit e çështjeve politike vlerësojnë se LDK është shembull për partitë tjera për organizimin e zgjedhjeve të brendshme.
Ata vlerësojnë se gara me më shumë kandidatë duhet të jetë standard për secilën parti.
Sipas tyre, nga lideri aktual i ri i LDK-së, varët edhe e ardhmja e koalicionit qeverisës, transmeton TribunaChanel.
Fisnik Korenica nga Grupi për Studime Juridike dhe Politike, thotë se standardin të cilin po e krijon LDK duke i pasur se paku tre kandidatë në garë për kryetar të LDK-së, duhet ta ndjekin edhe partitë tjera. Sipas tij, nuk mund të ketë garë nëse brenda një subjekti ka vetëm një kandidat. Në këtë kontekst, Korenica thotë se tre kandidaturat për kryetar të LDK-së në një farë forme tregojnë garë të brendshme partiake e cila, sipas tij, duhet çmuar.
E në anën tjetër, njohësi i çështjeve politike, Artan Muhaxhiri vlerëson se këto zgjedhje do të jenë më interesantet qe kanë ndodhur në LDK. Muhaxhiri thotë se ekzistojnë disa blloqe brenda LDK-së, dhe të cilat sipas tij, kanë dallime të mëdha mes veti, por njëkohësisht kanë përkrahje nga delegatët. Ai vlerëson se gara kryesore do të jetë në mes të kreut aktual të LDK-së, Isa Mustafa dhe presidentit të nderit të kësaj partie, Fatmir Sedjiu, transmeton tribunaChanel.
Sa i përket kandidaturave të Vjosa Osmanit dhe Lutfi Hazirit, Muhaxhiri vlerëson se janë të mirëseardhura, sepse e dinamizojnë garën, mirëpo, sipas tij, Osmani dhe Haziri nuk kanë shumë gjasa.
