“Jeni të dënuar me vdekje për tradhti ndaj Allahut!”. Ky ka qenë preteksti që “detyroi” xhihadistët e Shtetit Islamik të ekzekutojnë 9 persona dhe më pas të publikojnë videon me skena të përgjakshme.
Para ekzekutimit, nën presionin e terroristëve, pengjet pohojnë para kamerës se janë spiunë dhe u japin të drejtë xhihadistëve për t’ua marrë jetën. E prej aty, militantët pa hezitim tërheqin këmbëzën e armëve, duke i ekzekutuar 9 personat me një breshëri plumbash.
Në videon prej 7 minutash shfaqet edhe një komandant i maskuar i IS, i cili prej zyrës së tij jep mesazhin se xhihadi po kryen një punë të dyfishtë.
Ai paralajmëron se ISIS-i nuk po lufton vetëm me kundërshtarët e deklaruar, por edhe me shumë spiunë që gjenden në terren. Por, sipas tij, Shteti Islamik pati sukses në arrestimin e kësaj “qelizë” me spiunë, të cilët ishin të ngarkuar me detyrën për të monitoruar lokacionet e xhihadistëve.
Vërtetësia e kësaj videoje mbetet e dyshimtë për ekspertët, ashtu sikurse edhe videot e tjera që IS ka publikuar më herët. Por, sipas disa analistëve, deri tani nuk ka dalë në dritë asnjë provë e cila hedh poshtë këto ekzekutime makabër, që terroristët u bëjnë pengjeve.
Ndërkaq, së bashku me publikimin e videove në rajonin e përgjakur, ka edhe pretendime se IS po përdor gazin klor, si armë kimike kundër luftëtarëve, alarm ky që vjen edhe nga Këshilli i Sigurimit të Kurdistanit. /Top Channel/
