Kadri Kryeziu, ish anëtar i Gjykatës Kushtetuese të Kosovës, ka thënë se Enver Hasani, ish kryetari i kësaj gjykate, s’është dashur që të flasë publikisht për qëndrimet e tija karshi marrëveshjes së lidhur në Bruksel në mes Kosovës dhe Serbisë, për krijimin e Asociacionit të Komunave Serbe.
“Enver Hasani s’është dashur ta bëjë publik mendimin e tij karshi Asociacionit. Ne jemi juristë dhe sigurisht që i kemi mendimet tona karshi këtyre çështjeve, por s’mendoj se një gjë e tillë do të duhej të thuhej publikisht. Kjo për shkak se ne jemi edhe profesorë në universitet, e si pedagogë kemi një mision që të krijojmë harmoni dhe detyrë e jona si intelektualë është që këtë situatë ta stabilizojmë”, është shprehur Kryeziu në emisionin Zona e Debatit në Klan Kosova.
Kryeziu i është referuar deklaratave të Enver Hasanit, dhënë për Gazetën Zëri, ku kishte thënë se Gjykata Kushtetuese duhet të sqarojë termin “Kuvend kushtetutëbërës” që është përdorur në Marrëveshjen për themelimin e Asociacionit të Komunave me shumicë Serbe dhe se ka dallime të mëdha ndërmjet tekstit të Marrëveshjes në gjuhën shqipe me tekstin në gjuhën angleze, e që vlen në rast të kontesteve.
