Gati gjysma e deputetëve opozitarë janë arrestuar dhe po mbahen në paraburgim për shkak të hedhjes së gazit lotsjellës në Kuvend. Për shkak të vendosmërisë së dy palëve, Kuvendi i Kosovës rrezikon të mbetet pa deputetë të opozitës.
Kosova rrezikon të bëhet vendi i vetëm në Evropë që mund të mbetet pa opozitë parlamentare.
Kjo për faktin se deri më tani janë arrestuar 13 deputetë të opozitës, nga 31 sa janë gjithsej, për shkak të hedhjes së gazit lotsjellës në Kuvend, si formë kundërshtimi ndaj dy marrëveshjeve, atë për Asociacionin e Komunave me shumicë Serbe dhe për Demarkacionin.
Deri më tani janë arrestuar deputetët: Albulena Haxhiu, Donika Kadaj-Bujupi, Teuta Haxhiu, Time Kadriaj, Besa Baftiu, Aida Dërguti, Albin Kurti, Faton Topalli, Haxhi Shala, Pal Lekaj, Fisnik Ismaili, Glauk Konjufca dhe Ismajl Kurteshi, të cilët dyshohen se kanë kryer veprën penale përdorim i armës, i sanksionuar me Kodin Penal të Kosovës.
Nënkryetari i “Vetëvendosjes”, Driton Çaushi, ka thënë për gazetën “Zëri” se nuk do të ndalen me kundërshtimin e dy marrëveshjeve, edhe sikur të arrestohen të gjithë deputetët e opozitës së bashkuar dhe Kuvendi të mbetej pa opozitë. /Zëri/
