Kryeministri i Malit të Zi Milo Gjukanoviq i ka dërguar një mesazh kryeministrit të Kosovës Isa Mustafa lidhur me mosmarrëveshjet në Kosovë rreth Marrëveshjes mbi demarkacionin e kufirit ndërmjet dy vendeve, të nënshkruar më 26 gusht të këtij viti.
Në këtë mesazh, siç njofton Shërbim publik të kryeministrit të Malit të Zi, ndër të tjera thuhet:
“Duke vepruar me kërkesën e disa medieve vendore dhe të huaja, të cilat kanë pyetur për ndonjë koment ndaj deklaratave të disa zyrtarëve të Kosovës lidhur me kufirin mes Malit të Zi dhe Kosovës, Qeveria e Malit të Zi, informon publikun se ne konsiderojmë që mosmarrëveshjet në Prishtinë lidhur me Demarkacionin me Malin e Zi është çështje e brendshme e Kosovës.
Ne konsiderojmë se me Marrëveshje janë zyrtarizuar kufijtë administrativë në pajtim me Kushtetutën e Jugosllavisë të vitit 1974. Nëse ka dyshime se kjo nuk është bërë ashtu, dhe nëse janë bërë gabime, ne jemi të gatshëm këtë ta shqyrtojmë, sepse nuk dëshirojmë çfarëdo mosmarrëveshjesh me fqinjët tanë, duke marrë parasysh interesat shtetërore dhe kombëtare të Malit të Zi”.
Ky është thelbi i mesazhit të cilin kryeministri i Malit të Zi, Millo Gjukanoviq, ia ka përcjellë kryeministrit të Kosovës, Isa Mustafa dhe zyrtarëve të tjerë të Kosovës.
Përmbajtjen e këtij mesazhi për Koha.net e ka konfirmuar edhe Skënder Sharkinoviq, zëvendësambasador i Malit të Zi në Kosovë.
