Kryetari i Nderit i LDK’së, Fatmir Sejdiu, ka reaguar ndaj ngjarjeve në Kumanovë derisa ka shtruar pyetjen nëse kjo tragjedi do të mund të ndalohej.
Sejdiu ka shkruar se institucionet e Kosovës duhet të japin përgjigje për të gjitha dilemat që janë ngritur lidhur me ngjarjen e Kumanovës ku mbetën disa qytetarë të Kosovës të vrarë e të tjerë të arrestuar.
“Në anën tjetër, institucionet e Kosovës, duhet parë drejtë përgjegjësinë që kanë për qytetarët e saj, aq më tepër kur për këtë ka informacione kredibël, në mënyrë që t’u ndihmohet për të mos bërë veprime që mund të jenë të dëmshme për jetën e tyre dhe të tjerëve”, ka shkruar Sejdiu.
Lexojeni të plote reagimin
Ka ditë qytetarët e Kosovës dhe të Maqedonisë po edhe opinioni ndërkombëtar ndjen dhimbje dhe shqetësim për atë që ndodhi në lagjen “Kodra e Trimave” në Kumanovë. Humbën jetën të rinjtë për të cilët kishin nevojë familjet e tyre, po edhe shoqëria në Kosovë dhe Maqedoni.
Krahas kësaj dhimbjeje, pamjet që duken nëpër storje mediesh, tregojnë për fatkeqësinë dhe dëmet e mëdha jo vetëm materiale, por edhe shqetësimet dhe traumat që kanë lënë mbas ngjarja tragjike.
A ka mundur të shmanget kjo humbje jetësh, është pyetja që shtrohet aq shumë këto ditë. Përgjigjen e plotë nuk mund ta thotë sot askush, por besoj,me një analizë të ftohtë dhe të sinqertë të institucioneve kompetente, edhe kësaj pyetjeje mund t’i gjendet përgjigja.
Gjuha publike që u përdor në kontekst të tragjedisë së Kumanovës, edhe nga disa zyrtarë në Kosovë dhe Maqedoni, vetëm sa shtoi hutinë dhe shqetësimin, por tregoi edhe jo seriozitet për përgjegjësitë konkrete të secilit lidhur me ngjarjen. Vdekja e njerëzve gjithmonë ka përgjegjës dhe ata duhet ditur dhe duhet përcaktuar drejtë.
Mendoj se nacionalizmi maqedonas ka dhënë dhe po jep shkas për të gjykuar shqiptarët autokton në Maqedoni, se janë qytetarë të rendit të dytë. Duke mos realizuar në shumë parametra Marrëveshjen e Ohrit, politikanët kanë lënë hapësirë për veprime që nuk janë lehtë të kontrollohen.
Në anën tjetër, institucionet e Kosovës, duhet parë drejtë përgjegjësinë që kanë për qytetarët e saj, aq më tepër kur për këtë ka informacione kredibël, në mënyrë që t’u ndihmohet për të mos bërë veprime që mund të jenë të dëmshme për jetën e tyre dhe të tjerëve.
Dhimbja ime me atë që ngjau në Kumanovë, për jetët e humbura, është edhe më shumë se emocionale, mbasi si fëmijë, për shkak të ndjekjes së regjimit të Beogradit të shqiptarëve, me familjen kam jetuar në Hotëll të Kumanovës. E ndjej veten një qytetar të Kumanovës gjithmonë, pamjet e saj këto ditë shfaqur në media, treguan për lënien anash të zhvillimit.
Gjykoj se vetëm me politika të drejta ndaj secilit qytetar, Maqedonia mund të gjej prosperitetin e synuar. Ëndrrat për zhdukjen e popujve dhe diskriminim duhet harruar, sa më parë aq më mirë.
Gjuha e kërcënimeve dhe fyerjeve nuk duhet të trimërojë dhe as të frikësoj askënd.
Te Kosova, Maqedonia do te gjejë gjithmonë miqësinë dhe fqinjin e sinqertë, por gjithnjë duke pasur indikator të rëndësishme, pozitën e shqiptarëve, qytetarë të përgjegjshëm dhe të barabartë në Maqedoni.
