Familjarët e Isa Boletinit të palëkundur: Eshtrat të rivarrosen më 10 qershor në Boletin

E publikuar: 25/05/2015 16:33
Rreshtat+- AShkronjat+- Printo

Kryetari i Komunës, Agim Bahtiri, sërish u takua me familjarë të heroit kombëtarë Isa Boletini, ku ishte prezent edhe hoxhë Asllan Murati, i cili i ka ruajtur për më shumë se pesëmbëdhjetë vjet eshtrat e heroit në shtëpinë e tij, me të cilët ka biseduar rreth çështjes së rivarrimit të heroit.

Sipas një njoftimi të Komunës së Mitrovicës, kryetari Bahtiri, i ka njoftuar të pranishmit në takim për takimin me presidentin e Shqipërisë, Bujar Nishani, me ç’rast ky i fundit ka mbështetur fuqishëm vendosmërinë e kryetarit Bahtiri dhe të familjarëve të heroit Isa Boletini, që eshtrat e tij të rivarrosen në Boletin.

“Kryetari Bahtiri edhe në këtë takim kërkoj nga familjarët, të shprehin vullnetin e tyre se ku dëshirojnë që të rivarrosen eshtrat e heroit Isa Boletini, në Vlorë, sikur ka vendos Këshilli për Rivarrim i formuar nga Qeveria e Kosovës, apo në Boletin, që është vullnet i shprehur nga familjarët dhe kërkesë unanime dhe e fuqishme e Kuvendit të Komunës, qytetarëve, shoqatave të dala nga lufta e UÇK-së, intelektualët e shoqëria e civile e Mitrovicës, si dhe nga institucione të ndryshme të Republikës së Kosovës, kryetar komunash, shkencëtarë e intelektual me nam nga Kosova e më gjerë”, thuhet në njoftim.

Më tej shtohet se ai u tha familjarëve se nëse ata janë të vendosur që rivarrimi i eshtrave të heroit Boletini, të bëhet në vendlindje dhe në ditën e caktuar fillimisht nga Qeveria e Kosovës, pra më 10.06.2015, atëherë duhet t’i jepet edhe një shans Qeverisë së Kosovës, që të vendos se a donë të mbështes kërkesën unanime të mitrovicasve dhe familjarëve që heroi Isa Boletini të rivarroset në Boletin, apo jo.

Nëse qeveria thotë se është e gatshme të mbështesë kërkesën e familjarëve dhe kërkesën gjithë popullore për rivarrimin e eshtrave në Boletin, shtoi kryetari Bahtiri, atëherë institucionet e pushtetit lokal janë gatshme që të bashkëpunojnë maksimalisht me qeverinë e vendit për vazhdimin e menjëhershme të përgatitjeve për rivarrimin e eshtrave në Boletin.

“Por, nëse, qeveria e Kosovës, nuk shpreh gatishmëri për të tërheq vendimin skandaloz dhe të pakuptimtë e johuman të Këshillit për Rivarrim, me të cilin eshtrat parashihen të rivarrosen në Vlorë, e jo në Boletin, dhe nuk dëshiron të mbështet kërkesën tonë të përbashkët, atëherë ne nuk do të lejojmë më që dikush të luaj me heroin tonë, këtë figurë emblematike, por do t’i rivarrosim vet eshtrat e tij aty ku ka lindur dhe ku vazhdimisht ka shpreh dëshirën që të pushoj përgjithmonë. Komuna do të formoj këshillin e vet për rivarrim dhe do t’i mbuloj të gjitha shpenzimet”, ka thënë kryetari Bahtiri.

Familjarët e heroit Isa Boletini, rrethi i ngushtë dhe rrethi i gjerë, janë shprehur të qëndrojnë pa u lëkundur dhe vendosmërisht në qëndrimin e tyre se eshtrat e heroit Isa Boletini, duhet të rivarrosen, ashtu sikur është caktuar në fillim, pra më 10 qershor 2015, vetëm në Boletin dhe askund tjetër. Ata kërkuan nga kryetari Bahtiri që të jetë bashkë me ta në realizimin e kërkesës së tyre. /Telegrafi/