Sot, në Ditën Ndërkombëtare Kundër Korrupsionit, ish- menaxheri i pezulluar i prodhimit të dokumenteve në Ministrinë për Punë të Brendshme, Besnik Berisha, përmes një mesazhi dërguar në redaksinë e Koha.net ka thënë se gjatë 11 muajve sa ka qenë i pezulluar, ai ka marrë pagë, siç ka shkruar ai, pa punuar fare.
“Siç jeni në dijeni, në fillim të këtij viti publikisht pata denoncuar rastet korruptive në MPB:
– Ndërrimin dhe përshtatjen e specifikave teknike për prodhimin e pasaportave biometrike
– Ndërrimin e pajisjeve për personalizimin e pasaportave
– Ndërrimin e aparaturave nëpër të gjitha komunat për marrjen e të dhënave biometrike
– Shkatërrimin e mijëra pasaportave dhe letërnjoftimeve biometrike
– Furnizimin e panevojshëm me pasaporta e letërnjoftime ‘blanko’
– Vendosjen e mbiemrit Hoxha në letërnjoftimet specien, etj”, shkruan Berisha.
Berisha ka thënë se si pasojë e këtyre keqpërdorimeve buxheti i Kosovës është dëmtuar me miliona euro, derisa për denoncimet që ai i ka bërë thotë se është shpërblyer nga ministri i MPB-së, Skënder Hyseni me pezullim nga puna
Ky është sinjal negativ për të gjithë ata që i denoncojnë keqpërdorimet.
“Qe 11 muaj po marr pagë pa punuar fare. Tre muajt e parë 100 për qind të pagës, dhe tetë muajt e fundit 50 për qind të pagës. Më duket se nuk mbeti askush imun ndaj korrupsionit, qe 11 muaj jam i “korruptuar”, marr para nga shteti pa punuar!”, ka shkruar ndër të tjera Berisha.
Berisha ishte pezulluar nga më 9 shkurt, 2015, menjëherë pasi kishte denoncuar keqpërdorimet në ministrinë ku ai punonte.
