De Biasi do të vlerësohet me titullin “Honoris Causa”

E publikuar: 30/09/2015 20:35
Rreshtat+- AShkronjat+- Printo

Ka krijuar një skuadër që po bën të ëndërrojnë gjithë shqiptarët, është vetëm një hap larg realizimit të një misioni historik, kualifikimit për herë të parë të Shqipërisë. Mision aspak i lehtë që duhet kurorëzuar me sukses në ndeshjet e rradhës me Serbinë dhe Armeninë, por ndërkohë para këtyre sfidave, Gianni De Biasi nderohet me një titull që tregon se sa e cmojnë dhe e duan në Shqipëri. Trajneri i Kombëtares do të marrë të shtunën në Universitetin Europian të Tiranës titullin Honoris Causa në Shkencat Sociale. Sport News ka siguruar ndërkohë edhe motivacionin për vlerësimin akademik i cili është.

“Për meritat e jashtëzakonshme si kreativiteti, puna e madhe, kërkimi, disiplina taktike, në themelimin e ekipit kombëtar më të suksesshëm në historinë e futbollit.

Së bashku me ekipin, nëpërmjet sukseseve të tij ndërkombëtare, ka ndikuar cilësisht në ndryshimin e imazhit ndërkombëtar të shqiptarëve ; duke kontribuar kësisoj fuqimisht në krjimin e një ndjenje të forcuar kombëtare, në brezat e ndryshëm shqiptarë, brenda dhe jashtë vendit kryesisht tek të rinjtë, duke i afruar gjithnjë e më shumë ata tek sporti larg veseve të kohës që jetojmë.” shkruhet ne motivacionin per vleresimin e De Biasit.

Gianni De Biasi pritet që të vijë bashkë me familjen e tij në Tiranë dhe do të marrë cmimin Honoris Causa gjatë një ceremonie që do të zhvillohet të shtunën e ardhshme në orën 18.00 dhe ku pritet të jenë prezentë edhe Kryeministri i vendit Edi Rama, Presidenti i FSHF Armand Duka, ish Presidenti i Kosovës Behgjet Pacolli si dhe personalitete të tjera të fushave të ndryshme të jetës në vend.