Shefi i Grupit Parlamentar të PDK-së, Adem Grabovci e ka thënë një deklaratë të çuditshme. Ai ka thënë se ende nuk e kanë marrë draftligjin për Gjykatën Speciale, derisa Gazeta Blic nga burime të sigurta ka marrë vesh se është në dorën e liderëve të dy partive të koalicionit ky projektligj.
Madje, siç ka mësuar gazeta Blic nga burime ndërkombëtare, në një takim që e kanë zhvilluar Hashim Thaçi e Isa Mustafa në javën e kaluar me ambasadoren e SHBA-ve në Kosovë, Tracy Ann Jackobson dhe me shefin e zyrës së BE-së në Kosovë, Samuel Zhbogar, u është bërë e qartë atyre se as edhe një pikë apo presje nuk do të preket nga dfraftligji për themelimin e Gjykatës Speciale.
Megjithatë, Grabovci në një deklaratë që e ka dhënë për Telegrafin ka thënë se ende autoritetet kosovare nuk e kanë draftligjin.
“Jemi të interesuar të bisedojmë për një proces fer dhe posa ta marrim draftligjin do ta diskutojmë me kolegët deputetë. Jam i bindur se deputetët do të votojnë në përputhje me interesat e vendit. Nuk kam të drejtë as ligjore as morale për ta kërkuar votën e dikujt pa e ditur se për çka do të votojnë. Posa ta marrim draft ligjin nga Qeveria e Kosovës, do të diskutojmë me deputetët çështjen e votimit”, ka shtuar Grabovci.
Në një prononcim për Telegrafin ka thënë se deputetët e partisë së tij do të votojnë në përputhje me interesin nacional të Kosovës, kur bëhet fjalë për Gjykatën Speciale.
Ai nuk ka pranuar të thotë nëse PDK-ja i ka numrat e nevojshëm ose jo për t’i votuar amendamentet kushtetuese përmes të cilave mundësohet themelimi i Speciales, duke insistuar në faktin se është i bindur se ligjvënësit kosovarë janë të vetëdijshëm në rëndësinë dhe peshën e këtij procesi nëpër të cilin po kalon vendi.
