Brescia nuk shfrytëzoi një mundësi të mirë për të forcuar disi pozitat në zonën e play-offit për më tepër ndaj një rivali të drejtpërdrejtë si Novara duke barazuar 0-0 në shtëpi. Në takimin e luajtur përpara tifozëve të saj, ekipi lombard regjistroi barazimin e dytë radhazi madje duke rrezikuar dhe të humbasë sfidën. Vendasit e drejtuar nga Boscaglio u përqëndruan kryesisht në lojën në mbrojtje duke lejuar Novarën që të marrë një barazim që e mban 3 pikë përpara Brescias në renditje. Në fundtabelë Livorno, që luan për mbijetesë doli pa pikë nga sfida e luajtur në Toskanë. Vendasit u mundën 1-0 nga Pro Vercelli që gjithashtu nuk është aspak në pozita të favorshme në renditje.
Një 11-metërsh i shndërruar në gol në minutën e 93-të nga ana e Marchit i dha miqve 3 pikë të rëndësishme duke qenë tashmë jashtë zonës së ftohtë, ndërsa për Livornon mbijetesa është ende e mundshme, por gjithsesi bëhet akoma më e vështirë pas kësaj humbje në shtëpi.
