“Lojë imagjinare, e padefinuar, të synuar për të blerë kohë për shkak të pamundësisë të njërit tabor e taborit tjetër, që t’i kenë numrat për të votuar institucionet e reja”, e ka quajtur profesori, Mazllum Bajraliu dështimin e deputetëve për të konstituuar Kuvendin e Kosovës, edhe pas tentimit të 22-të me radhë.
Ai në magazinën “Info Plus” të RTK-së tha se është krijuar tashmë një opinion në publik që kjo situatë, po ngjanë në parodi.
“Është krijuar opinion publik tashmë, si diçka që ngjanë me parodi, me një teatër politik absurdi, e që po i sjellë dëme të pariparueshme Kosovës. Ndërsa ata me një mungesës së të ndjesisë e përgjegjësisë politike po sillen në një rreth vicioz duke e akuzuar njëra- tjetrën, por kriza politike është e dëmshme për Kosovën”, tha Baraliu në RTK.
Profesori Baraliu e ka quajtur këtë situatë për keqardhje, të papranueshme, të pandershme e të pahijshme.
Baraliu tha se deputetët janë bllokuar hermetikisht, ndonëse secili mandatin e merr nga populli.
“Ndonëse garon nga partia politike , mandati i deputetit e deputetes është personal që e merr nga populli”, tha ai.
Baraliu tha se Gjykata Kushtetuese do të duhej që vendimin e saj ta sqaronte saktësisht se çka ka dashur të thotë në aktgjykimin e saj të vitit 2014 për të drejtën e deputetëve për të votuar, për kundër apo abstenim.
